Bè hơ̆ sùm pah dơ̆ tus mang ngai dơ̆ 2 mờ ngai dơ̆ 5 pah poh, ơdŭ bơto akhar tàm ƀòn Kret Krot, xã H’Ra, kơnhoàl Mang Yang pờ àng tai đèng, kơno tai săp bơtê sền akhar bơh ală cau bơsram dê. Ơdŭ bơsram krơi is ngan do geh rlau 40 nă cau, bơh kơnòm dềt tus ală cau bèp, cau mè là kòn cau Bahnar bơh ƀòn Kret Krot dê. Tơnơ̆ dồ ngai lơh broă bòl glar kal ke, bi Sen (45 sơnam), neh lòt bơsram di tŭ nàng bơsram bơtê cih akhar. Bè uă oh mi cau ùr ndai sơl, bi Sen bao bơh gờñ ngan, hìu bơnhă kal ke, ờ geh lòt bơsram. Tŭ do ơdŭ bơto akhar geh pờ, bi lơh nền lòt bơsram tài bơh sền do là tŭ niam ai să tờm he dê in. Bi Sen, đơs: Añ ờ gĭt akhar, kờñ lòt bơsram nàng gĭt akhar nàng gĭt cih măt he dê, lòt tiah lơi hơ̆ den gĭt cih măt he dê.

Ndrờm bè hơ̆ sơl, bi Mah (29 sơnam) là cau dồ ƀòn bal kung lòt tus hờ ơdŭ bơsram tơnơ̆ dồ ngai lòt lơh broă tàm mìr kòi sơl. Mpàng tê kră kơldang ngan bơh cau mìng kwèng mờ wơu mờ sơ̆, tŭ do tơryăng tơryồng ngan kun bồ bơtê cih tơl akhar, tơl sồ. Bulah kal ke, bi Mah kung jơh nùs lơh ngan bơsram akhar tài bơh pin dờn là broă gĭt akhar rơ̆p dong kwơ uă ai să tờm mờ hìu bơnhă in. Bi Mah, đơs: Añ kờñ bơsram nàng gĭt akhar nàng hìng nau he lòt tiah lơi hơ̆, he gĭt akhar kung ƀươn ƀoài rlau. Dilah bè tŭ do ờ gĭt akhar lòt tiah lơi cau kung lah lơm, bè ngai ne añ lòt hờ hìu sơnơm kòn gơtìp kòp cau sồr añ cih mat mờ he ờ gŏ gĭt cih den tàng ƀak sĩ lah bơh tŭ hơ̆ añ gơlơh rơngòt ngan. Tŭ do, añ mìng kờñ lòt bơsram nàng gĭt akhar nàng tơnơ̆ do lòt tiah lơi kung ƀươn ƀoài rlau.

Tìp măt tơm bơh bơr mờ làng bol tàm ƀòn lơgar, Trung úy Lê Tuấn Thành, kwang bàng Kwang àng xã H’Ra, kơnhoàl Mang Yang, càr Gia Lai gĭt loh làng ngan bơta siơ̆u siar bơh làng bol dê. Ờ gĭt akhar den tàng làng bol tìp uă ngan kal ke tŭ lơh ală sră pơ àr tàm kâp xã. Ngan tài bè hơ̆, geh bơta ai gơnoar bơh kâp hơđang dê, kâp ủy gơnoar ătbồ tiah do dê, Trung úy Thành neh gơgơs là dồ nă cau pơgru nàng dong ală hìu làng bol gĭt akhar, gĭt kờp sồ, bơh hơ̆ rơhời tam gơl bồ tơngoh kơlôi sơnơng, broă lơh tàm bơtàu tơnguh lơh sa. Trung úy Lê Tuấn Thành, đơs: Tơngai sơnrờp gam kal ke là tài bơh làng bol gam ƀàs sìl, ờ khin mờ broă lòt bơtê akhar. Làng bol là kòn cau Bahnar den tàng broă tơm bơh bơr mờ làng bol gam gơlơh kal ke dồ êt tài bơh ờ gĭt dà đơs, gơlơh ờ hềt gĭt wă bal mờ gơ̆p tài bơh ờ hềt gŏ geh bơta kwơmàng. Nàng gàr sùm ơdŭ bơto akhar jŏ jòng den pơgồp bal mờ ală anih lơh broă cíñ trị, ală kwang ătbồ thôn, kwang àng, pơgồp bal broă bơsram mờ lơh geh cồng nha rơ̆p geh ală phan pà, phan ƀàn ai cau bơsram in.

Xã H’Ra, kơnhoàl Mang Yang, càr Gia Lai geh 9 thôn, ƀòn, khà làng bol jơi bơtiàn dồ êt nă cau geh tus 2/3, mìng là kòn cau Bahnar lơm. Ồng Dung, Phó Củ tịc Ủy ƀan Ñân zân xã H’Ra, pà gĭt, broă klau pơgru Lê Tuấn Thành bơto akhar pơgồp bal mờ mblàng yal, hòi jà làng bol, dong Kwang àng xã tam klăc đềt mềr rlau mờ làng bol, lơh jăt niam broă lơh hòi jà làng bol. Ồng Dung, đơs: Bơsram akhar, làng bol gĭt wă rlau, tŭ he lơh broă lơh mblàng yal den kung ƀươn ƀoài rlau, tơnơ̆ do làng bol lơh ală broă lơh, lơh broă lơh sa, blơi phơng sih, sơnơm tơm ba nàng drơng ai broă lơh sa in mờ bơtàu tơnguh rài kis. Gơnoar ătbồ tiah do lam lơh hòi jà làng bol bè mblàng yal bè jơnau bau gờñ ờ hềt di sơnam ai bau, bau mờ cau rềp jơi nòi bal den làng bol ƀươn wă wờng rlau. Kơ̆p kờñ ơdŭ bơsram do geh lơh tàm ƀòn Kret Krot den tơnơ̆ do rơp rề ơnàng lơh uă tus ală ƀòn ndai tai.