VOV4.K’ho - Ơdŭ ờ gal kơnòm bơsram, uă hìu bơsram dềt geh bal tàm dùl bă tiah, hơ̆ là dùl tàm ală tơngu me lơh càr Gia Lai ờ tơl rơlao 3 rơbô 400 nă cau pơgru lài mờ nam bơsram pa. Tàm tŭ hơ̆, broă tơrgùm ơdŭ, tơrgùm hìu bơsram tàm càr do tơngai do lơh lơyài, lơh ờ geh cồng nha tus mờ jơnau kờñ tơmù cau pơgru, tơnguh uă cồng nha broă bơto bơtê kung bè tơmù bơta ờ tơl cau pơgru.

Tàm xã Ia Sol, kơnhoàl Phú Thiện: Hìu bơsram kấp 1 THắng Lợi (9 ơdŭ) mờ hìu bơsram kấp 2 Trưng Vương (12 ơdŭ), mơya 4 nam do ờ gơtùi tơrgùm bal jăt di mờ kơrnoăt geh ai

Là kơnhoàl geh uă hìu bơsram dềt, mơya bơh 4 nam lơh jăt gùng dà rơndăp hìu bơsram, ơdŭ bơsram, kơnhoàl Phú Thiện, càr Gia Lai mìng gơmù geh 3 hìu bơsram. Mò Nguyễn Thị Hoa, Kwang atbồ phòng Giáo dụk mờ Đào tạo kơnhoàl Phú Thiện pà git, geh uă tơngu me lơh kơnhoàl do ờ hềt lơh jăt mơ broă tơrgùm ơdŭ, tơrgùm bal hìu bơsram dềt ờ gal: “Mùl màl, tàm tŭ do den gơtùi tơrgùm bal, pơgồp bal ờ uă ơdŭ bơsram tai. Lơh geh hìu bơsram tờm den geh tơmŭt uă, bơsong tus nam 2025 hơ̆ sồng geh bơsong jơh. Tơrgùm mpồl cau pơgru den tơrgùm geh, mơya ngài den broă atbồ cồng nha ờ niam. Gam ală hìu bơsram rềp den di gơlan tàm tơngai tus pal tơrgùm ờ uă hìu bơsram tai. Tus tŭ do, di gơlan geh tơrgùm ală kấp bal”.

Jăt broă sền wơl bơh Sở Giáo dụk mờ Đào tạo mờ Sở Nội vụ càr Gia Lai yal, broă do, ală kơnhoàl Phú Thiện, An Khê, Đức Cơ kung gam uă hìu bơsram kấp 1 mờ kấp 2 dềt, ờ tus 10 ơdŭ bơsram tàm 1 hìu bơsram mờ hờ đơm 20 nă kơnòm bơsram tàm 1 ơdŭ. Tàm ală kơnhoàl Ia Pa, Kbang, Kông Chro, Krông Pa, Chư Păh, Chư Pưh geh tus 21 hìu bơsram mầm non geh hờ đơm 5 ơdŭ. Ală hìu bơsram do ndrờm pal tơrgùm bal tài ờ tơl bè khà ơdŭ jăt mờ kơrnoăt bơh Ƀộ Giáo dụk mờ  Đào tạo geh ai.

Tơrgùm ơdŭ, tơrgùm hìu bơsram dềt ờ gal geh pơgồp bal tàm broă bơsong broă ờ tơl cau pơgru tàm càr Gia Lai

Ờ mìng ờ pràn tàm broă tơrgùm ơdŭ bơsram, tơrgùm hìu bơsram, gơnoar atbồ ală kơnhoàl gam ờ geh broă pơgồp bal mờ gah bơto bơtê mờ bơsram nàng tơrgùm wơl hìu bơsram ală kấp. Ồng Lê Duy Định, Kwang atbồ Sở Giáo dụk mờ Đào tạo càr Gai Lai pà git: “Bol añ dan tơrgùm 6 hìu bơsram kấp 2 geh khà ơdŭ hờ đơm 15 tàm ală kơnhoàl Kbang, Đức Cơ, Phú Thiện, Ia Pa, Krông Pa. Bol añ geh sră nggal sồr UɃÑZ ală kơnhoàl do yal ală hìu bơsram kấp 2 nàng tơrgùm bal, mơya ờ geh jơnau ală kơnhoàl hơ. Sồr kấp ủy ală kơnhoàl kung pal sền gròi. Di lah ờ sền gròi, geh ờ bơsong broă lơh do”.

Lơh jăt broă tơrgùm bal, rơndăp wơl ală hìu bơsram, bơh nam 2018 tus tŭ do, càr Gia Lai neh gơmù 4 hìu bơsram bơto sùm mờ tơmù geh 83 hìu bơsram, 515 ơdŭ, 406 hìu bơsram ing. Bơdìh mờ ală kơnhoàl, thị xã geh lơh niam, den kung gam geh uă kơnhoàl lơh geh cồng nha ờ uă ngan bè: thị xã Ayun Pa, ală kơnhoàl Phú Thiện, Mang Yang, Đức Cơ, Ia Grai, ƀòn dờng Pleiku... khà hìu bơsram dềt ờ gal tơrgùm bal mìng kờp geh ờ uă ngan. Bơta mùl màl do lơh ờ ndrờm bal mờ broă lơh ngan tơrgùm ơdŭ, tơrgùm hìu bơsram nàng bơsong broă ờ tơl cau pơgru, lơh tơmù khà cau pơgru mờ tơnguh uă bơta niam broă bơto mờ bơsram.

Pơn jăt tai lơh jăt Nghị quyết sồ 19 bơh Dà lơgar bè gah bơto bơtê mờ bơsram, tơngai bơh nam 2022 tus 2025, càr Gia Lai geh tơmù tai 8 mpồl lơh broă, 17 hìu bơsram, 97 hìu bơsram ing. Lơh geh bơta do, càr geh tềm pềr tơlao 1 rơbô 700 nă cau pơgru. Bal mờ khà cau pơgru pa geh dà lơgar bơtơl, càr Gia Lai geh bơsong bơta kal ke ờ tơl cau pơgru tŭ do.

Tàm pơrjum gah bơto bơtê mờ bơsram geh bơyai lơh tàm nggùl nhai 8 nam 2022 do, mò Nguyễn Thị Thanh Lịch, Phó Củ tịc UɃÑZ càr Gia Lai sồr ală kơnhoàl, thị xã, ƀòn dờng pal lơh jăt niam broă tơrgùm wơl, rơndăp wơl ală hìu bơsram nàng tơmù broă ờ tơl cau pơgru, gàr niam gơnoar kwơ broă bơsram sră bơh kơnòm bơsram dê: “Neh jào Sở Giáo dụk mờ Đào tạo bal mờ Sở Nội vụ in sền wơl tus tơl hìu bơsram ing, hìu bơsram dềt tàm ală tiah. Mờ càr ờ geh broă lơh lơi ndai tai bơdìh mờ broă pal lơh jăt mơ nàng gàr niam geh tơl khà cau pơgru. Añ sồr ală kơnhoàl, thị xã mờ ƀòn dờng pal mhar lơh mơ. Bol añ geh pơn jăt tai sền wơl, sền gròi broă lơh jăt do, pơgồp bal mờ kơnòl bơh cau lam bồ dê”.

Cau mblàng Ndong Brawl