Dơ̆ pơrjum neh sền sơ wì, ring bal ală nghị quyết kuơmàng, bè: tam gơl, tam pà broă rơndap lơh bơcri priă dà lơgar; dong kờl lơh sa tàm gah lơh sa suơn sre gơ wèt Broă lơh jơnau kờñ dà lơgar tơrmù rƀah kơ̆ kơljap; snag tĕ mat ală rơndap broă lơh bơcri priă pal ai wơl ù mờ ală rơndap broă lơh bơcri priă pal tam gơl jơnau kờñ ngui tam kòi, ù brê rơcang gàr nàng ngui ai jơnau kờñ ndai in… Jat ồng Trần Đức Quận, Ƀí thư  Tỉñ ủy, Củ tịc Hội đồng Ñân zân càr Lâm Đồng đơs, do là ală tơngume kuơmàng nàng càr pơn jat tai lam lơh geh cồng nha ală kơnòl, jơnau kờñ ai tơlik.

Kung tàm pơrjum, Hội đồng Ñân zân càr Lâm Đồng lam lơh sền sơ wì broă lơh kwang bàng. Jat hơ̆, ồng Nguyễn Khắc Bình, Ƀí thư Huyện ủy- Củ tịc Hội đồng Ñân zân kơnhoàl Cát Tiên geh pồ lơh Phó Củ tịc Hội đồng Ñân zân càr Lâm Đồng khoă X, tơngai lơh broă bơh nam 2021 tus nam 2026; ồng Nguyễn Ngọc Phúc- Ƀí thư Huyện ủy Đức Trọng geh pồ lơh Phó Củ tịc Ủy ƀan Ñân zân càr Lâm Đồng.