Drim ngai 17/3, tàm hìu lơh broă Tỉñ ủy càr Lâm Đồng neh geh lơh Pơrjum lơh jat Kơrnuat bơh Ƀộ Cíñ trị dê bè broă lơh kwang bàng. Ồng Nguyễn Thái Học, Phó Kwang atbồ Ƀan Nội cíñ dà lơgar, kwang tàm Mpồl đơng lam tam gơl wơl sền gàr adat boh lam dà lơgar geh ntrờn, tam pà kơnòl at gơnoar broă Ala mat Ƀí thư Tỉñ ủy càr Lâm Đồng.

Nàng gàr bơta đơng lam bồ tơn, tơl làm, đơng lam sùm bơh Ƀộ Cíñ trị, Ƀan Ƀí thư mờ Đảng dà lơgar dê gơ wèt mờ Tỉñ ủy càr Lâm Đồng, Ƀộ Cíñ trị lơh nền ntrờn, sồr ồng Nguyễn Thái Học, Phó Kwang atbồ Ƀan Nội Cíñ dà lơgar tus bal tàm Ƀan Cấp hàñ, Mpồl lơh kơnòl broă sùm mờ at gơnoar broă Ala mat Ƀí thư Tỉñ ủy càr Lâm Đồng, tơngai lơh broă bơh nam 2020 tus nam 2025. Ồng Nguyễn Thái Học deh nam 1972, ƀòn tờm tàm xã Hoà Quang Bắc, kơnhoàl Phú Hòa, càr Phú Yên; geh ƀằng Tiến sĩ Khoa họk cíñ trị, kử ñân Luật; kử ñân cíñ trị. Đơs dờp kơnòl broă, Ala mat Ƀí thư Tỉñ ủy càr Lâm Đồng ồng Nguyễn Thái Học ai lơh pơn iờ să ngan tŭ geh Ƀộ Cíñ trị, Ƀan Ƀí thư Đảng dà lơgar, Mpồl rơndap broă dà lơgar pin dờn, jàu kơnòl broă dờng màng pa.