VOV4.K’ho - Mho òr (05/05), tàm hìu Quốk hội, Ủy ƀan Thường vụ Quốk hội bơyai lơh yal mờ jào Nghị quyết tơn pồ ồng Phạm Thái Hà at gơnoar broă Phó Củ ñiệm Văn phòng Quốk hội mờ kung là Kwang dong broă Củ tịc Quốk hội.

Ala măt Ủy ƀan Thường vụ Quốk hội, Phó Củ tịc Thường trực Quốk hội ồng Trần Thanh Mẫn chờ gờm mpồl kwang bàng đơng lam Văn phòng Quốk hội neh geh bơtơl, pồ tơl kwang bàng đơng lam mờ chờ gờm să tờm ồng Phạm Thái Hà geh Ủy ƀan Thường vụ Quốk hội pin dờn, tơn pồ at gơnoar broă Phó Củ ñiệm Văn phòng Quốk hội. Phó Củ tịc Thường trực Quốk hội pin dờn mpồl kwang bàng đơng lam, kwang bàng, kông cứk, viên cứk, cau lơh broă tàm Văn phòng Quốk hội sùm dùl nùs, ring bal, tam klăc nàng bơ̆t bơtàu dùl mpồl pràn kơl dang, geh pơnrơ jăk tơl ală bơta; sùm tơlik broă lơh ring bal, loh làng, khoa họk tàm broă jào broă lơh, jào kơnòl, pơgồp bal lơh broă geh cồng nha.

Cau mblàng Ndong Brawl