Di dơ̆ tơngkah kir sơn rai 76 nam ngai Cau ling sồt să, cau ling chơ̆t màng, tàm tơngume lòt còp mờ lơh broă tàm càr Dăk Lăk, drim ngai 24/07, ồng Phan Đình Trạc, Kwang atbồ Ƀan Nội cíñ Dà lơgar bal mờ mpồl lơh broă neh lòt còp ƀlàng tơ̆p ƀồc cau ling chơ̆t màng càr dê mờ tus lùp còp, pơndờm pơnđiang hìu bơnhă ală cau chơ̆t màng chơ̆t phi să tŭ lơh kơnòl broă tàm tŭ lơh kơnòl broă tàm kơnhoàl Cư Kuiñ, càr Dăk Lăk dê.

Tàm hìu bơnhă ală cau chơ̆t màng, mpồl lơh broă neh chu ñàng kah kơ lôi ală kwang bàng, cau ling neh chơ̆t phi să khin cha ngan tài bơh bơta ring lơngai bơh làng bol dê, lùp còp, pơndờm pơnđiang mờ pơyoa jơnau tam pà bal muăt jrùm tus mờ cau pròc mhàm ală cau chơ̆t màng dê.

Đơs mờ hìu bơnhă ală kwang bàng, cau ling dê bè bơta roh rui jê sồt ngan do, ồng Phan Đình Trạc, Kwang atbồ Ƀan Nội cíñ dà lơgar đơs nền, Đảng, Dà lơgar, sùm sền gròi lơh jat broă lơh, broă lơh dong kờl gơwèt mờ kwang bàng, cau ling chơ̆t phi să; geh uă broă lơh pơndờm pơnđiang, tam pà bal nàng cau pròc mhàm ală cau chơ̆t màng in gờñ sơr lèt gan bơta roh rui dờng ngan do.

Lài hơ̆, mpồl lơh broă neh tus chu ñàng, pơdơng bơkào tàm ƀlàng tơ̆p ƀồc cau ling chơ̆t màng tàm càr Dăk Lăk dê.