Bal mờ jơnau mblàng hơ lơh loh, dờp jơnau đơs bơh cau tĕ khà bè ală gah lơh sa mpồl bơtiàn, ồng Phan Đình Trạc neh sồr gah lơh broă geh gơnoar càr Lâm Đồng sền wơl, bơsong broă ai càn priă sa priă cồng uă mờ gal cau tĕ khà geh jơnau đơs.

Tàm hơ̆ geh broă làng bol càn 270 tơlăk đong mơya anih cah rơña sồr pal tơm cau ai càn priă in rơlao 4 tơmàn đong là bơta geh ngan bơh cau tĕ khà Kơ Să Ka Thêm dê. Đơs tàm dơ̆ tìp mờ cau tĕ khà, ồng Phan Đình Trạc, Kwang geh jơng tàm Ƀộ Cíñ trị, Ƀí thư Đảng Dà lơgar, Kwang atbồ Ƀan nội cíñ dà lơgar đơs là, ală jơnau đơs, jơnau dan bơh cau tĕ khà là di pal ngan. Broă ai càn sa priă cồng uă tàm càr đơs bal mờ să tờm mò Kơ Să Ka Thêm đơs is, ồng Phan Đình Trạc sồr anih lơh broă geh gơnoar càr Lâm Đồng pal lùp khào, Anih cah rơña càr Lâm Đồng pal sền wơl dơ̆ cah rơña geh tơngŏ gơtìp tìs lơh glài lah ờ.