Tàm pơrjum, geh bơta jàu gơnoar bơh Ƀan Ƀí thư mờ Kwang atbồ Mpồl rơndap broă dà lơgar dê, ồng Phan Thăng An, Phó Kwang atbồ Mpồl rơndap broă dà lơgar yal jơnau lơh nền bơh Ƀan Ƀí thư dê bè broă ntrờn,  sồr ồng Trần Hồng Thái, kwang geh jơng tàm Mpồl duh broă Đảng dà lơgar, Thứ trưởng Ƀộ Jak chài mờ Măi mok tus bal Mpồl duh broă, Mpồl lơh kơnòl broă sùm, at gơnoar broă Phó Ƀí thư Tỉñ ủy càr Lâm Đồng tơngai bơh nam 2020 tus nam 2025 mờ yal tơnggit nàng pồ at gơnoar broă Củ tịc Anih duh broă làng bol càr Lâm Đồng, tơngai bơh nam 2021 tus nam 2026.

Ồng Trần Hồng Thái deh nam 1974, ƀòn tờm tàm kơnhoàl can Lộc, càr Hà Tĩnh; jơh bơsram mờ geh ƀằng giáo sư, tiến sĩ; jơh bơsram đại họk tàm lơgar Nga, sền gàr jơnau cribơyai kờñ ai ƀằng tiến sĩ gah Jak chài plai ù mờ Toán họk tàm Đại họk tơrgùm bal Heidelberg, lơgar Đức.