VOV4.K’ho- Drim ngai 29/05, tàm kơnhoàl Bá Thước, càr Thanh Hoá geh lơh Dơ̆ ai cau lòt Lơh broă Ơruh pơnu lơh broă dong kờl is kàl rlô bơkang nam 2022 bơh Đoàn Ơruh pơnu Kộng sản Hồ Chí Minh dà lơgar bơyai lơh. Broă lơh Ơruh pơnu lơh broă dong kờl is kàl rlô bơkang nam 2022 geh lam lơh bal mờ uă broă lơh geh kwơ tàm 74 kơnhoàl rƀah gơwèt 26 càr, 54 xã kal ke uă ngan tiah ƀlàng kềng gah dà lềng, tiah rềp kềng dà lềng mờ tiah bồt bơlào gơwèt 12 càr mờ 33 Ƀòn ơruh pơnu mŭt lơh broă bơh Đoàn ơruh pơnu dà lơgar bơcri priă lơh tơngai bơh nam 2001- 2020.

Broă lơh ơruh pơnu lơh broă dong kờl is nam do geh lơh bơh ngai 01/06 tus ngai 31/08 mờ jơnau đơs làm uă- ờdo ờdă- cồng nha- kơ̆ kơl jăp gơ jăt bal mờ kơnòl broă cíñ trị, jơnau kờñ ngan ngồn bơh tơl tiah, tơl anih dê. Đơs tàm Dơ̆ bơyai lơh ai cau lòt lơh broă, Phó Củ tịc duh broă sùm Quôk hội ồng Trần Thanh Mẫn sồr: Mpồl đơng lam Đoàn pal pơn jăt tai gĭt nền Broă lơh ơruh pơnu lơh broă dong kờl is kàl rlô bơkang là dùl dơ̆ pơrjum cíñ trị kwơmàng, bơh Broă lơh do nàng bơto bơtê bồ tơngoh kăc màng, nùs nhơm, rài kis niam chài ai đoàn viên, ơruh pơnu in, lơh kah wơl nùs nhơl lơh broă dong kờl is, rơcăng lài tă pơgồp, pơdơng să, phi să tài ală bơta kwơ dềt rơhền bơh să tờm dê tài bơh bơta kwơ bal dê, mpồl bơtiàn dê, tài bơta pas gơs mờ bơtàu tơnguh bơh dà lơgar dê.

Cau mblàng Lơ Mu K’Yến