VOV4.K’ho- Mho ngai 06/05, tàm Hìu Quôk hội, Ủy ƀan Lơh broă mờ lơgar ndai pơgồp bal mờ Mpồl lơh broă kwang bàng ala măt làng bol pồ gơwèt Ủy ƀan Thường vụ Quôk hội, Cơldŭ lơh broă Quôk hội, Mpồl Nghị sĩ gĭt gơ̆p lơh bơyô bal Việt Nam mờ Đại sứ quán Hàn Quôk tàm Việt Nam bơyai lơh Dơ̆ jàu Gai lòng Quang Hoa bơh Cíñ phủ Hàn Quôk dê pà Kwang ătbồ Mpồl lơh broă kwang bàng ala măt làng bol dê pồ, Củ tịc Mpồl Nghị sĩ gĭt gơ̆p lơh bơyô bal Việt Nam mờ Hàn Quôk lài do là ồng Trần Văn Túy.

Ủy viên Ƀộ Cíñ trị, Phó Củ tịc Duh broă sùm Quôk hội ồng Trần Thanh Mẫn tus bal dơ̆ bơyai lơh jàu pà. Dờp Gai lòng Quang Hoa bơh Cíñ phủ Hàn Quôk dê, ồng Trần Văn Túy ki ngàm ưn ngài Quôk hội mờ Cíñ phủ Hàn Quôk neh cih dờp ală broă lơh ngan dong bơtàu tơnguh bơta gĭt gơ̆p lơh bơyô bal bơh 2 mpồl nghị sĩ 2 lơgar dê; mơkung ưn ngài bơta dòn kơnờm, nùs nhơm đềt mềr ngan, lơh broă bal jơh nùs ngan mờ geh cồng nha bơh Mpồl Nghị sĩ gĭt gơ̆p lơh bơyô bal Hàn Quôk mờ Việt Nam bal mờ Mpồl Nghị sĩ gĭt gơ̆p lơh bơyô bal Việt Nam mờ Hàn Quôk dê.

Cau mblàng Lơ Mu K’Yến