Drim òr (02/03), tàm Pơrjum ni sơna dơ̆ 4, Quốk hội khoă XV neh sền sơwì, tơlik kơrnoăt broă kwang bàng kấp dờng pồ Củ tịc lơgar Kộng hoà xã hội củ nghĩa Việt Nam tơngai bơh nam 2021 tus 2026. Jăt mờ hơ̆, ồng Võ Văn Thưởng, Kwang geh jơng tàm Ƀộ Cíñ trị, Thường trựk Ƀan Ƀí thư Đảng dà lơgar khoă XIII, kwang bàng Quốk hội Khoă XV neh geh pồ lơh Củ tịc lơgar mờ cồng nha geh 487 tàm 488 nă Kwang bàng Quốk hội ring bal (ndrờm mờ 98,38%).

Tàm jơnau đơs dờp guh at gơnoar broă tơnơ̆ mờ hơ̆ tơn, Củ tịc lơgar ồng Võ Văn Thưởng đơs tờm geh drơng gàr bơ̆t bơtàu mờ ngui niam bơta pràn tam klăc bal dờng gùt jơi bơtiàn, đềt mềr, iăt ală jơnau đơs tài làng bol, tài dà lơgar bơh ală cau lơgar Việt Nam kờñ gơboh mờ dà lơgar; lơh jăt nền nòn jơnau “làng bol là tờm”; ai bơta kwơ di mờ adăt boh lam mờ di pal bơh làng bol là tiah sơn đờm, là jơnau kờñ kwơ màng bơh ală broă lơh, “Broă lơi geh kwơ làng bol in, he pal jơh nùs lơh. Broă lơi gơtìp aniai tus làng bol, he pal jơh nùs pleh”. Lơh ngan tam dră, rơcang sơndră mờ sa kwề sa koà, ờ niam; lơh gơs ndrờm bal kơrnoăt pal jăt tơnguh bơtàu kơl jăp; bơ̆t bơtàu mpồl kwang bàng lơh broă dà lơgar kloh niam, kơl jăp mờ pràn kơl dang.