VOV4.K’ho- Drim ngai 22/6, tàm Hà Nội, Thường trựk Ƀan Ƀí thư Đảng dà lơgar bơyai lơh Pơrjum pơlam lơh jat mờ lam lơh jat Nghị quyết sồ 15 ngai 05/5/2022 bơh Ƀộ Cíñ trị dê bè gùng dà, kơnòl broă bơtàu tơnguh càr lơgar Hà Nội tus nam 2030, broă wèt sền tus nam 2045. Đơs đơng lam tàm pơrjum, ồng Võ Văn Thưởng đơs nền, Nghị quyết sồ 15 neh đơs loh gùng dà, jơnau kờñ, kơnòl broă, broă lơh tờm ngan nàng bơtàu tơnguh càr lơgar Hà Nội tus nam 2030, broă wèt sền tus nam 2045 bơh bơta ai jơnau đơs bơh ală Ƀộ, gah broă lơh, ală tiah dê đơs tàm pơrjum.

Ồng Võ Văn Thưởng sồr Đảng ƀộ, ƀòn dờng Hà Nội pal bơyai lơh ai kwang bàng, đảng viên mờ làng bol in kơlôi sơnơng, bơsram, pơlam lơh jat uă tơngume Nghị quyết, tơnguh broă lơh yal tơnggit, mblàng yal jơnau mờ uă broă lơh li la, bơh hơ̆ tơnguh mờ ring bal jơnau git wă bè bơta kuơ, gơnoar broă dờng màng jơnau sồr kơnòl broă bơtàu tơnguh Hà Nội tàm ală nam tus. Bơdìh hơ̆ tai, ƀòn dờng kung pal hòi jà tă pơgồp bơta pràn tơrgùm bal lam lơh ngui geh cồng nha bơta pràn, bơta ƀuơn bơh càr lơgar dê pơgồp bal mờ bơta pràn bơh gùt lơgar mờ bơta pràn dunia dê nàng bơt bơtàu mờ bơtàu tơnguh càr lơgar niam chài gơguh jak dipal mờ Tiah tờm cíñ trị hàñ cíñ dà lơgar, là plai nùs bơh gùt lơgar dê.

Cau mblàng K’Duẩn