VOV4.K’ho - Drim òr (19/01), tàm hìu lơh broă Đảng Dà lơgar, Mpồl đơng lam Dà lơgar tơn jơh Nghị quyết sồ 26 bơyai lơh pơrjum gùt lơgar pơgồp jơnau yal tơn jơh broă lơh jăt nghị quyết sồ 26 bơh Ƀan Cấp hàñ Dà lơgar khoă 10 bè broă lơh sa suơn sre, làng bol lơh broă sa, ƀòn lơgar.

Tàm pơrjum, ală kwang bàng tơlik nùs nhơm ring bal mờ đơs niam rơndăp broă jơnau yal bè ală cồng nha tơnơ̆ mờ rơlao 13 nam lơh jăt nghị quyết neh geh gơrềng bal dờng màng ngan tus mờ tiah lơh sa suơn sre, ƀòn lơgar, làng bol lơh broă sa mờ tus lơh sa – mpồl bơtiàn dà lơgar. Jăt mờ hơ̆, khà gơguh lơh sa suơn sre geh khà uă 2,94%. Khà tăc mờ lơgar bơdìh ală bơta phan lơh sa suơn sre, brê bơnơm, phan tàm dà gơguh 8,17% tàm 1 nam. Broă lơh jăt jơnau kờñ dà lơgar bơ̆t bơtàu ƀòn lơgar pa lơh gơs lài 1 nam nggùl... Bơh broă cri bơyai ờ uă jơnau đơs pơgồp bal tàm tiah lơh sa suơn sre, làng bol lơh broă sa, ƀòn lơgar tàm lơgar he gam geh uă bơta ờ pràn, bè khà gơguh gah lơh sa suơn sre geh tơngŏ lơyài wơl, ờ kơl jăp. Broă bơ̆t bơtàu ƀòn lơgar pa gam tìp uă kal ke, ờ niam. Priă geh tàm ƀòn lơgar gam ờ uă, ờ ndrờm bal tiah, đah ƀòn lơgar mờ ƀòn drà gam uă.

Cau mblàng Ndong Brawl