Tus bal dar pơrlòng mpồl geh 19 mpồl tus bơh ală Huyện đoàn, Thị đoàn, Thàñ đoàn mờ Đoàn gơwèt bal. Mờ 3 bơnah pơrlòng, tàm hơ̆ geh: Ơruh pơnu bơceh lơh, ơruh pơnu git wă mờ ơruh pơnu mblàng yal, ală mpồl pơrlòng geh tus bal hơ jơnau lùp trăc nghiệm geh tơlik tàm Internet, lơh tàm jơnang nàng yal mpồl pơrlòng mờ jơnau ai tơngit bơh dơ pơrlòng, pơrlòng lơh lèo bè jơnau mblàng yal nền nòn ờ uă bơta tàm Dăt Nhàr dà lơgar Việt Nam mờ ală kơrnoăt gơrềng bal tus mờ tiah nhàr dà lơgar.

Tàm broă lơh do kung geh bơyai lơh dar pơrlòng dŭt ndơl cau dùl nă să bơh 4 nă cau pơrlòng. Do là ală cau pơrlòng jăk ngan tàm khà mờr 83 rơbô nă cau tus pơrlòng tàm dar bơdìh geh bơyai lơh tàm 4 poh lài mờ hơ̆ (bơh ngai 08 nhai 01 tus ngai 03 nhai 02 nam 2024).