VOV4.K’ho - Neh gơs bơhiàn, tơnơ̆ mờ ơm rơlô satềp, ơruh pơnu gùt lơgar ñhăp ñhar lòt ling lơh jăt kơnòl kwơ màng mờ Dà lơgar. Tàm càr Dăk lăk, geh mờr 3 rơbô nă ùr ơruh, klao pơnu neh rơcang lòt gùng lơh jăt kơnòl ling klàng tơnơ̆ mờ nam pa Ñâm Zần nam 2022.

                                    Klao pơnu càr Dăk Lăk cih măt dan lòt ling nam 2022

Tàm dơ̆ rơwah ling do, klao pơnu Nguyễn Trung Sơn (24 sơnam, kis tàm mpồl ƀòn 8, thị trấn Quảng Phú, kơnhoàl Cư̆ Mgar, càr Dăk Lăk) neh cih sră dan lòt ling. Sơn là git: oh gam lơh broă măi rơndeh dùl hìu lơh sa tàm kơnhoàl mờ khà priă nhai geh sùm 7 tơlăk đong tàm 1 nhai. Mơya mờ nùs nhơm kờñ lơh jăt kơnòl bơh să tờm dê gơwèt mờ ƀòn lơgar, dà lơgar, oh ơm ing broă lơh sa nàng lơh jăt broă lòt ling. “Oh pơnyờ să ngan tŭ geh rơwah lòt ling. Oh geh lơh gơs niam ală kơnòl geh jào bơh cau kơnòm să dê. Oh git tŭ mŭt tàm mpồl ling geh nền nòn mờ kal ke ngan, mơya oh geh lơh ngan bơsram tàp niam nàng bañ lơh ờ niam tus mờ nùs nhơm kơ̆p kờñ bơh ală cau neh ai oh in”.

                                    Klao pơnu càr Dăk Lăk tus kham nàng geh rơwah lòt ling

Tŭ cih sră dan lòt ling, klao pơnu Trương Thái Hoàng (25 sơnam) gam lơh kwang bàng đoàn tàm sơnah ƀòn Ea Tam, ƀòn dờng Buôn Ma Thuột. Hoàng neh jơh bơsram gah Lơh sa-Hìu bơsram Đại học Tây Nguyên, mờ là dùl nă cau geh đảng gam kơnòm să. Oh cih sră dan lòt ling nàng geh sền gàr dà lơgar, đòm jăt bèp tờm dê-dùl nă kwang bàng ling klàng neh jơh sơnam lơh broă. “Mờ kơnòl là klao pơnu gam kơnòm să neh jơh bơsram đại học den pal geh nùs nhơm kơ̆p kờñ mờ geh kơnòl gơwèt mờ dà lơgar là, pal lòt ling. Tàm tơngai ơm tàm mpồl ling pal lơh jăt niam kơrnoăt, tiah kis tàm mpồl ling nàng lơh gơs kơnòl geh jào, lơh gơs kơnòl gờñ nàng tŭ rê mờ mpồl bơtiàn gơs dùl nă làng bol niam rơlao”.

Nam 2022, càr Dăk Lăk geh jào rơwah 2 rơbô 977 nă làng bol lơh jăt adăt lòt ling. Ală tiah tàm càr neh lơh niam broă rơwah ling, hòi làng bol lòt ling, geh 100% khà geh ai. Ală ùr ơruh, klao pơnu lòt ling ndrờm gàr niam jơnau kờñ bè cíñ trị, sơnam, bơta pràn kơl dang să jan, bơta ngăc ngar tàm broă bơsram sră. Tàm hơ̆ geh 60 nă làng bol geh jơh bơsram đại học-cao đẳng; 4 nă cau là đảng viên, khà gam tai ndrờm là đoàn viên; ơruh pơnu là kòn cau geh rơlao 50%. Đại tá Lê Văn Hùng, Phó kwang đơng lam mờ kung là kwang atbồ Mpồl đơng lam ling klàng càr Dăk Lăk pà git: “Mpồl duh broă ling klàng càr neh đơng lam ai ală tiah in bè gùng dà tơnguh ală mpồl lơh broă cíñ trị, mpồl bơtiàn, kấp ủy, gơnoar atbồ ală kấp bơyai lam sồr, bơto bơtê, yal bè adăt lòt ling kung bè ală sră nggal bơto sồr bơh Ƀộ, bơh Quân khu, Mpồl duh broă ling klàng kấp càr tus mờ ală làng bol tàm sơnam rơcang lòt ling. Mờ bol añ bơyai lơh loh làng, ndrờm bal broă ờ lòt ha là ơm ing gơwèt mờ ală cau geh ơm ing ha là ờ lòt ling. Bơh tŭ hơ̆, làng bol, ală cau tàm sơnam rơcang lòt ling geh bơyai lơh ală dơ̆ kham rơwah nàng rơcang lòt ling”.

Tus tŭ do, jơh ală klao pơnu lòt ling tàm càr Dăk Lăk neh geh cit sơnơm vaccine rơcang sơndră mờ kòp kovid-19 ding dơ̆ 2 mờ geh ờ uă cau neh cit ding dơ̆ 3. Jăt rơndăp broă, tàm drim ngai 16 nhai 2 nam 2022, ală tiah tàm càr Dăk Lăk geh bơyai lơh jun, rò ală klao pơnu lòt ling, gàr niam ờ do ờ dă mờ mùl màl là ngai chờ bơh cau kơnòm să ală jơi bơtiàn kòn cau càr Dăk Lăk.

Cau cih Tuấn Long- Cau mblàng Ndong Brawl