Oh klao Nguyễn Đức Danh, bơsram ơdŭ 12 A1, hìu bơsram kấp 03 Lương Thế Vinh, kơnhoàl Kbang, càr Gia Lai là dùl tàm 08 nă ơruh pơnu, pơnrơ jăk càr Gia Lai dê tàm nam 2023. Tàm hìu bơsram, oh neh geh 04 tơngu me bơta chài măi mok ndrờm geh khà jờng dờng. Tàm hơ̆ geh tơngu me ngui bơta chài măi mok pa AI tàm broă dong kờl jăt sền mờ atbồ hìu bơsram geh khà dùl bơh dơ̆ pơrlòng tin họk cau kơnòm să càr Gia Lai dơ̆ XXII nam 2023, khà bàr dơ̆ pơrlòng tin họk cau kơnòm să tiah tàm gùl lơgar mờ Tây Nguyên mờ khà pơn jờng gùt lơgar.

Oh Nguyễn Đức Danh kung là cau geh pơnrơ ngan tàm broă bơsram mờ đòm jăt ơnà jăk, nùs nhơm niam bơh Hồ Chí Minh dê geh càr Gia Lai bơyai lơh. Oh Nguyễn Đức Danh pà git: “Mờ gơnoar broă kung là cau tàm mpồl đơng lam đoàn hìu bơsram dê, oh sùm lơh ngan tus bal tàm ală broă lơh. Là dùl nă kơnòm bơsram den oh git broă bơsram sră mờ cồng nha jơnau bơsram sră là broă kwơ màng ngan. Gơtùi geh ală cồng nha niam tàm broă bơsram sră mờ là kòn gơlòng sồr, kơnòm bơsram jăk bơh Wa Hồ dê là mùl màl ngan mờ geh kwơ ngan nàng tơnơ̆ do gơs cau pơgồp bal bơ̆t bơtàu dà lơgar dê”.

Kung geh uă jơnau kơ̆p kờñ lơh broă, lŏ Nguyễn Hoài Phương, Ƀí thư Đoàn Ơruh pơnu Kộng sản Hồ Chí Minh kơnhoàl Chư Păh, càr Gia Lai neh bal mờ ơruh pơnu tàm kơnhoàl do lơh ngan bơ̆t bơtàu ƀòn lơgar pa mờ broă lơh sa mpồl bơtiàn dê. Tàm hơ̆, geh pơnrơ ngan là gùng ơruh pơnu geh ồs đèng sòl àng mờ camera sền gàr bơta lơngăp lơngai tàm ƀòn Phung, xã Ia Mơ Nông. Bal mờ hơ̆ là 05 nơm hìu nùs nhơm mờ uă broă lơh dong kờl ală kơnòm dềt kòn đời là jơi bơtiàn ờ gal cau in.

Lŏ Nguyễn Hoài Phương pà git: “Là dùl nă cau ùr lam bồ đoàn, añ sùm kơ̆p kờñ pal bơsram Wa Hồ bơh ală broă dềt ngan, ƀuơn ngan. Tàm tơngai pa do, añ bal mờ đoàn viên ơruh pơnu tàm kơnhoàl tus bal lơh gơs rơlao 550 bơnah broă, broă lơh ơruh pơnu dê mờ kờp jơh khà priă rơlao 8 tơmàn 500 tơlăk đong. Bol añ đơs hơ̆ là tiah ƀuơn nàng ơruh pơnu geh bơsram, bơsram tàp, lơh broă mờ gơs dờng”.

Bơh nam 2021 tus tŭ do, tàm càr Gia Lai geh 235 nă ơruh pơnu geh jờng rơ là ơruh pơnu đòm jăt jơnau bơto bơh Wa Hồ dê. Bi Đỗ Đức Thanh, Phó Ƀí thư Đoàn ơruh pơnu Kộng sản Hồ Chí Minh càr Gia Lai pà git, tàm ală dơ̆ pơrlòng bè: ơruh pơnu lơh broă nùs nhơm dong kờl, cau kơnòm să bơceh lơh, cau kơnòm să lam lài sền gàr Dà lơgar, ơruh pơnu mŭt lơh broă… geh uă ngan ơruh pơnu neh ai tơngŏ geh nùs nhơm gơboh kờñ lơh broă, nùs nhơm lam lài ngui bơta pràn kơnòm să dê tàm broă bơsram sră, lơh broă, bơtàu tơnguh lơh sa – mpồl bơtiàn. Bi Đỗ Đức Thanh pà git: “Broă lơh geh uă ală cau lam lài geh pơnrơ jăk, broă lơh niam là dùl tàm ală broă lơh geh lơh sùm. Bol añ geh broă rơndăp lơh jăt dùl tơngu me bè lơh geh uă ală broă lơh do, tàm hơ̆ uă ngan là lơh pràn broă bơsram mờ lơh jăt ơnà jăk, nùs nhơm niam, broă lơh bơh Hồ Chí Minh dê. Bơh tŭ hơ̆ kung ai geh nùs nhơm chờ nàng bơsram bal lơh geh ală cau kơnòm să lam lài geh kwơ mpồl bơtiàn in”.

Bơh tàm mùl màl broă mblàng yal, lơh pràn broă bơsram mờ đòm jăt ơnà jăk, nùs nhơm niam, broă lơh bơh Hồ Chí Minh dê ai rơnàng kơnòm să tàm càr in tàm tơngai do, Mpồl duh broă sùm Tỉñ Đoàn càr Gia Lai ai geh ờ uă broă lơh nàng tơnguh uă bơta niam bơsram mờ đờm jăt Wa Hồ tàm tơngai tus. Pah nam lơh geh broă rơndăp lơh jăt dùl tơngu me bơh càr dê, bơyai lơh dơ̆ pơrjum cri bơyai cíñ trị mờ tơngu me “Kah bè Wa-Nùs nhơm he sàng goh rơlao” tàm dơ̆ tơnkah tờm ngai deh Wa Hồ dê. Lơh jăt broă lơh “Sòl àng nùs nhơm kơ̆p kờñ cau kơnòm să Việt Nam”, bơyai lơh jờng rơ ơruh pơnu gơguh jăk đòm jăt jơnau bơto bơh Wa Hồ ală kấp, jờng rơ ơruh pơnu geh pơnrơ jăk tàm ală gah broă. Lơh pràn broă lơh jăt dơ̆ lam lơh “Pah ngai dùl jơnau tơngit niam, pah poh dùl jơnau niam” tàm ală pang internet să tờm, fanpage bơh ală kấp ƀộ Đoàn, Hội. Tơrgùm lơh jăt Broă rơndăp lơh bơh Mpồl duh broă sùm Tỉñ Đoàn dê bè broă lơh geh uă cau lam lài, jơnau niam tàm broă bơsram sră mờ đòm jăt ơnà jăk, nùs nhơm niam, broă lơh bơh Hồ Chí Minh dê bơh tŭ do tus nam 2027.