Bal mờ jơnau đơs “rwah cau lơi, kơnhăp cau hơ̆”, nam 2024, Mpồl duh broă kơnòl broă ling klàng ală kâp tàm càr Lâm Đồng neh lơh sền swì săc rwah nàng rwah ală ơruh pơnu jak ngan lơh jăt kơnòl broă ling klàng, pal tơl khà jàu, niam mờ lơh geh ală jơnau sồr bè bơ̆t bơtàu mpồl ling klàng tàm bơta pa. Tàm hơ̆, ơruh pơnu geh bơta pràn khà dùl mờ khà 2 lơh geh rlau 64%; khà ơruh pơnu jơh bơsram kâp pe geh 36%; trung kâp, kao đẳng mờ đại họk là 7,5%. Tàm khà do, geh 22 nă cau pa lòt ling là đảng viên, mờr 34% cau pa lòt ling là oh kòn ală jơi bơtiàn dồ êt nă cau. Bal mờ ală ơruh pơnu lơh jăt kơnòl broă ling klàng, dơ̆ do uă ơruh pơnu jak ngan càr Lâm Đồng dê kung lòt gùng lơh jăt kơnòl broă kwang àng.

Tàm dơ̆ bơyai lơh jàu dờp ling, kwang đơng lam bồ càr Lâm Đồng mờ ală kơnhoàl, ƀòn dờng tàm càr neh pà bơkàu, pơndờm pơnđiang ală cau pa lòt ling đòm jăt bơhiàn khin cha jak chài bơh jơi bơtiàn dê, lòt jăt cơnđoà jơng lòt bơh rài bèp rài bi dê lòt gùng lơh kơnòl broă dờng màng gơ wèt mờ Dà lơgar. Lài hơ̆, ală tiah bơh càr Lâm Đồng dê kung bơyai lơh chờ sàl lòt ling; còp mờ pà phan, pơndờm pơnđiang ală cau pa lòt ling.