Tàm cri bơyai, ală cau ala măt đơs mùl màl, tài geh uă bơta, jơnau ờ ring bal cau klao mờ cau ùr kung gam geh tàm mpồl bơtiàn, lơh geh jơnau git wă bè cau klao mờ cau ùr, bơta geh bè cau klao, cau ùr. Den tàng, mờ ală jơnau git wă bal mờ bơta geh tàm mùl màl geh gŏ, ơruh pơnu đơs bal, ơruh pơnu jơi bơtiàn ờ gal cau đơs is pal là mpồl lam lài tàm broă mblàng yal, tam gơl jơnau git wă tus mờ ală cau gùt dar bè jơnau git wă bè cau klao mờ cau ùr.

Cau bơsram dờng Triệu Thị Nhung, kòn cau Dao, bơsram tàm Hìu bơsram Đại họk Sư Phạm – Đại họk Đà Nẵng yal: “Tàm ƀòn lơgar añ dê kung gam geh bơta bè là cau ùr tŭ jơh bơsram kấp 2 ha là kấp 3 là pal ơm tàm hìu lơh broă ha là jòi bao. Tài cau dờng mờng đơs là cau ùr bŭ lah bơsram uă den tơnơ̆ do rê bao kung ờ dong kờl bơta kwơ lơi ai hìu nhă in. Den tàng cau mè bèp mờng sồr kòn lòt jòi bao gờñ mờ ơm bañ lòt bơsram. Añ kơlôi tàm tiah ƀòn añ dê ơruh pơnu pal lơh ngan mblàng yal ală jơnau kơlôi sơnơng bơh să tờm dê nàng lơh tam gơl ală bồ tơngoh kơlôi sơnơng ờ niam hơ̆”.

Ală cau ala măt gam đơs là, nàng tam gơl jơnau git wă bè cau klao mờ cau ùr bal mờ bơta geh cau klao mờ cau ùr pal geh broă pơgồp bal bơh uă bơta, bơh broă bơto bơtê, broă dong kờl tus mờ bơta niam chài mpồl bơtiàn. Tàm hơ̆ pal tơnguh broă bơto bè ring bal cau klao mờ cau ùr tàm hìu bơsram, pơgồp bal tàm ală broă bơto kung bè lam cau bơsram dờng tus bal ală mpồl lơh broă, ală broă lơh mpồl bơtiàn. Bơh tŭ hơ̆ tơnguh jơnau git wă nàng bơsong ală bơta să tờm kung bè mblàng yal tàm mpồl bơtiàn. Mò Hoàng Thị Hạnh, Thứ trưởng lài do, Phó Củ ñiệm Anih duh broă Jơi bơtiàn đơs là, ơruh pơnu jơi bơtiàn ờ gal cau wă bè jơi bơtiàn, bơta niam chài krơi is jơi bơtiàn să tờm dê. Ală ơruh pơnu rơ̆p geh gùng dà di pal nàng rơhời kơrian, tơn jơh jơnau git wă ờ di pal bè cau klao mờ cau ùr, bơta tơngŏ lài cau klao mờ cau ùr. Mò Hoàng Thị Hạnh pà git: “Gơnoar kwơ màng tŭ ơruh pơnu bơyai lơh ală broă lơh nàng mblàng yal mờ ală jơnau đơs pơn đik, tamya; mờ ală broă lơh niam tàm ală mpồl, bơyai lơh ală broă lơh tìp bal mpồl bơtiàn bơh jơi bơtiàn do dê mờ jơi bơtiàn ndai tàm ală jơi bơtiàn ờ gal cau; bơsram bal ală broă lơh niam, tàm hơ̆ geh jơnau git wă bè cau klao mờ cau ùr bal mờ bơta tơngŏ lài cau klao mờ cau ùr neh geh sơrbì ha là rơhời kơrian”.

Đơs tàm sơn đờm cri bơyai, Phó Củ tịc Mpồl tam klăc cau ùr Việt Nam mò Nguyễn Thị Thu Hiền pà git: Cri bơyai là dơ̆ niam nàng lơh ală cau ala măt, ală kơnòm bơsram dờng, ơruh pơnu geh tam gơl bal, tam pà bal jơnau đơs, mờ iăt ală jơnau geh kwơ, jơnau kwơ màng drơng tàm broă lơh, ai broă bơtàu tơnguh bơh să tờm dê bal mờ kơ̆p kờñ pơgồp bal ai mpồl bơtiàn in bơh tơl nă cau dê. Gơwèt mờ Mpồl tam klăc cau ùr Việt Nam mờ ală gah lơh broă gơrềng bal, do kung là dơ̆ niam nàng sền wơl loh làng rơlao tai gơnoar bơh ơruh pơnu, cau bơsram dờng dê tàm broă tus bal lơh pràn ring bal cau klao mờ cau ùr tiah làng bol jơi bơtiàn ờ gal cau mờ tiah kơh bơnơm, nàng geh ală gùng dà broă lơh, tơnguh broă pơgồp bal kwơ màng bơh mpồl do dê. Jăt mò Nguyễn Thị Thu Hiền đơs, broă tơn jơh jơnau git wă ờ di pal bè cau klao mờ cau ùr, bơta geh cau klao mờ cau ùr pal geh broă dong kờl, ai geh bơta niam, bơh uă gah, mpồl lơh broă gơrềng bal, lơh pràn mờ pơlam ơruh pơnu lơh jăt nùs nhơm kơ̆p kờñ bơh să tờm dê. Mò Nguyễn Thị Thu Hiền pà git: “Kơ̆p kờñ ngan Ƀộ Bơto bơtê mờ Bơsram rơ̆p lơh pràn ală broă yal tơngit, tơnguh uă jơnau git wă, bơyai lơh uă broă lơh hờ bơdìh nàng ai geh jơnau git, jơnau wă bè ring bal cau klao mờ cau ùr ai cau bơsram dờng in, nàng mpồl cau do rơ̆p mùl màl là mpồl lam lài tàm broă tơn jơh jơnau git wă ờ di pal cau klao mờ cau ùr, bơta tơngŏ lài cau klao mờ cau ùr, lơh pràn ring bal cau klao mờ cau ùr”,

Cri bơyai geh bal tàm mpồl broă bơh Broă lam lơh ờs mờng lam sồr lơh pràn ring bal cau klao mờ cau ùr mờ tơngu me “Ơruh pơnu Jơi bơtiàn ờ gal cau lam lài tam gơl jơnau git wă ờ di pal cau klao mờ cau ùr tài bơta kơ̆p kờñ bơtàu tơnguh”. Mpồl broă lơh geh bơyai lơh geh bal tàm mpồl Rơndăp broă lơh sồ 08 “Lơh jăt ring bal cau klao mờ cau ùr mờ bơsong ală bơta jal mhar gơwèt mờ cau ùr mờ kơnòm dềt” gơwèt Broă jăt jơnau kờñ dà lơgar bơtàu tơnguh lơh sa mpồl bơtiàn tiah làng bol jơi bơtiàn ờ gal cau mờ tiah kơh bơnơm tơngai bơh nam 2021 tus 2030. Ală cau bơsram dờng tus bal mpồl ală broă lơh do là ală cau lam lài tam gơl jơnau git wă bè cau klao mờ cau ùr, bơta ai geh cau klao mờ cau ùr tàm hìu nhă mờ mpồl bơtiàn, tơn jơh ală bơhiàn ờ gam di pal lơh kơrian bơta bơtàu tơnguh bơh să tờm bal mờ mpồl bơtiàn dê. Tơl nă cau bơsram dờng là dùl nă cau mblàng yal niam, geh uă jơnau bơceh lơh, broă lơh niam, bơceh lơh tàm broă mblàng yal nàng tơnguh uă jơnau git wă bè cau klao mờ cau ùr, ring bal cau klao mờ cau ùr tus mờ bơyô, cau pròc mhàm tàm hìu nhă bal mờ rơnàng kơnòm să dê… pơgồp bal tàm broă lơh pràn rơlao tai broă ring bal cau klao mờ cau ùr tàm tiah làng bol jơi bơtiàn ờ gal cau mờ tiah kơh bơnơm.