VOV4.K’ho - Mờ bồ tơngoh kờñ tơnguh bơtàu, lơh pas tàm ù tiah tờm ƀòn lơgar dê, uă ùr ơruh klao pơnu tàm kơnhoàl rơƀah Buôn Đôn, càr Dăk Lăk neh jòi gùng dà broă lơh pa nàng mŭt lơh broă mờ geh dong kờl bal tơnguh bơtàu.

Tus wơl mờ broă lơh tơnơ̆ mờ ală ngai ơm rơlô satềp Ñâm Zần, bi Hồ Thế Mỹ, kis tàm xã Ea Ñuôl, kơnhoàl Buôn Đôn, càr Dăk Lăk gam lơh ngan pơgồp bal mờ ală mpồl kă bro, hìu tăc nàng pờ anih tăc phan ƀăng tây.

                                 Bi Hồ Thế Mỹ (đah ma) yal bè suơn tam ƀang mờ cau tus blơi in

Tŭ do, rơlao 10 lồ ù tam tờm ƀăng tây bơh kông ty Kổ phần Kă bro broă lơh drơng ala Phan geh lơh bơh broă lơh sa suơn sre Hữu kơ Việt Nguyên (geh bi Mỹ lơh tờm) mờ pơgồp bal làng bol lơh broă sa neh tus kàl tơnhào tờm. Pah ngai, 1 lồ gơtùi ai tơnhào geh di pơgăp 1 tạ tus 1 tạ nggùl ƀăng ris, mờ khà priă tăc geh bơh 40 rơbô đong rơlao hờ đang jăt mờ tơl bơta.

Tam pà bè broă mŭt lơh broă, bi Mỹ pà git, bơh lồi nam 2018, bi dan mờ cau tàm hìu nhă sơbì jơh 5 sào ù tam kơphe, tam gơl tam ƀăng tây. Tam ndang mờ bơsram broă lơh mờng chài tàm ală càr, bi tơrgùm ală cau bơyô geh nùs nhơm kờñ lơh broă bal nàng crơng gơs kông ty, pơgồp bal mờ drà kă bro. Bi Hồ Thế Mỹ yal: “Añ tìp uă ngan kal ke bè sơntìl, bè broă lơh den añ neh tus tàm ală tiah geh tam uă ngan nàng bơsram. Ală tiah mờ tam ală bơta phan tam jŏ nam gơtìp ờ geh tơnhào uă den he ai tờm ƀăng tây nàng tam, lơh niam mờ broă he sền gàr ờ geh ngui phơng hoá học den tờm ƀăng geh hòn gơs niam. Añ bal mờ 3 nă cau mŭt lơh broă mờ kông ty Việt Nguyên, tơnguh bơtàu pràn rơlao, bơ̆t bơtàu uă rơlao broă tam ƀăng tây do. Ai ƀăng tây tus mờ làng bol, tam gơl broă lơh, dong kờl sơntìl, phơng sih, mờ bal mờ làng bol tơnguh bơtàu phan tam do tàm ù tiah Buôn Đôn do”.

                           Mpồl mŭt lơh broă kơnhoàl Buôn Đôn tus sền ală broă lơh mŭt lơh broă

Kơ̆p kờñ pơgồp bal nàng dong kờl bal tơnguh bơtàu, nhai 10 nam 2021, ală klao pơnu gam mŭt lơh broă tàm kơnhoàl Buôn Đôn, bơh mpồl lơh broă Đoàn mờ mpồl tam klăc ơruh pơnu kơnhoàl neh lơh gơs mpồl mŭt lơh broă. Bi Nguyễn Văn Hải, Atbồ mpồl pà git, mờ tơngu me kờñ dong kờl bal ală bơyô mŭt lơh broă geh cồng nha, mpồl gam pơgồp bal mờ ală mpồl lơh broă geh bơta pràn, cau bơcri priă mờ ală cau geh broă mờng chài nàng dong kờl tơn, bơto pơlam ơruh pơnu in. “Pah nhai geh dùl broă lơh kơphe mŭt lơh broă, jà ală cau jăk tus mblàng ha là ală cau lơh start up mùl màl nàng cri bơyai mờ mpồl bơtiàn mŭt lơh broă. Tìp bal, cri bơyai bal jơnau tơngit bơh ală gah, mpồl lơh broă bè Phòng Nông nghiệp, Phòng lơh sa-Hạ tầng bè ală broă bơto pơlam broă lơh sa suơn sre, bơto pơlam broă lơh sa mờ măi mŏk; yal jơnau tơngit uă tus mờ ală bơyô mŭt lơh broă tàm mpồl bơtiàn mŭt lơh broă. Tus còp, sền ală broă lơh, pơgồp bal ală broă lơh mờ ală hìu kă bro mờ ală mpồl lơh broă yal tơngit sră ƀăo nàng chồl mhar broă tăc phan ai ală mpồl mŭt lơh broă in”.

Jăt bi Nguyễn Quang Trung, Ƀí thư Huyện đoàn Buôn Đôn pà git, bal mờ broă crơng gơs mpồl mŭt lơh broă, nàng tơnguh bơta pràn kơnòm să mờ nùs nhơm khin kơlôi, khin lơh bơh đoàn viên, ơruh pơnu dê, tơngai do ală mpồl đoàn, mpồl tam klăc ơruh pơnu tàm kơnhoàl neh lơh uă broă dong kờl ơruh pơnu tơnguh bơtàu lơh sa bè: bơyai lơh ală ơdŭ bơto, ală dơ̆ pơrjum cri bơyai bè mŭt lơh broă. Pơgồp bal mờ Ngân hàng Cíñ sác xã hội kơnhoàl ai ơruh pơnu in càn priă, bơcri kes priă dong kờl mŭt lơh broă... mờ khà rơlao 66 tơmàn đong dong kờl ơruh pơnu lơh jăt ală rơndăp broă tơnguh bơtàu lơh sa. Bi Nguyễn Quang Trung đơs: “Bol añ lơh ngan lơh geh nùs nhơm mŭt lơh broă tàm ơruh pơnu, ai tơl bơta niam ală bơyô in geh tìp mờ ală khà priă nàng tơnguh bơtàu, ai geh ală dơ̆ pơrjum cri bơyai nàng ală bơyô gơtùi pơgồp bal, nàng bơsong kal ke tàm broă lơh jăt ală start up tàm kơnhoàl do. Añ kung kơ̆p kờñ là kâp ủy, gơnoar atbồ lơh ngan sền gròi tus mờ broă mŭt lơh broă, tàm hơ̆ uă ngan là broă mŭt lơh broă cau kơnòm să tàm kơnhoàl dê. Ală kơ cế broă lơh bơh Cíñ phủ, bơh càr den pal geh ală broă tơrgùm bal loh làng mờ di pal, jŏ tơngai rơlao mờ ai tơl bơta uă rơlao ai broă mŭt lơh broă đơs bal mờ kung bè broă mŭt lơh broă cau kơnòm să đơs is tàm kơnhoàl dê”.

Cau cih H’ Xíu-Cau mblàng Ndong Brawl