Poh lài, Kông ty Ồs đèng càr Dăk Lăk (PC Dăk Lăk) pơgồp bal mờ Cơldŭ lơh broă Kảñ sát rơcăng sơndră mờ crùh ồs sa mờ dong kờl rềs àr- Kwang àng càr Dăk Lăk neh bơyai lơh 2 ơdŭ mblàng yal, bơto yal jơnau gĭt wă mờ bơto pơlam kơnòl broă ờs mờng rơcăng sơndră mờ crùh ồs sa ai rlau 530 nă kwang bàng, cau lơh phan cau lơh broă gah ồs đèng in. Ồs đèng Dăk Lăk tŭ do ătbồ 17 broă bơ̆t bơtàu gơ wèt anih lơh broă geh bơta sơbơng roh bè ồs sa, bơrtoh; bơdìh hơ̆ tai, gam geh 14 mpồl đơng lam lơh sa bơh ală ồs đèng ƀòn lơgar dê.

Tơngai lài, broă lơh rơcăng sơndră ồs sa bơrtoh sùm geh gah ồs đèng sền gròi uă ngan, bơcri bơta pràn, priă jền nàng lơh jăt niam. Tàm dơ̆ bơto pơlam pa do, ală kwang bàng cau lơh broă ồs đèng Dăk Lăk neh geh kwang bàng Kảñ sát rơcăng sơndră mờ crùh ồs sa bơrtoh càr Dăk Lăk yal tơngĭt bè broă ồs sa bơrtoh, bơto yal ală sră nggal adat boh lam geh gơrềng tus broă lơh do. Bal mờ hơ̆, broă bơto yal bơta gĭt wă, ală broă lơh sền gàr lơngăp lơngai rơcăng sơndră mờ crùh ồs sa, ală cau bơsram neh geh bơto pơlam sền swì kờp sền ală jơnau pơhìn ngòt rơngơ̆t bè ồs sa bơrtoh, tàp ngui ală măy mok phan ngui crùh ồs sa, bơta chài dô klàs bơh rềs àr tàm tiah ồs sa, broă dong kờl bơh sơnrờp cau gơtìp aniai in...Mơkung tàp crùh ồs sa, dong kờl rềs àr tàm jơnau digơlan gơlik geh ồs sa tàm hìu duh broă Kông ty mờ hìu prăp phan Ea Tam. Dơ̆ bơto pơlam dong kờl ală kwang bàng cau lơh phan gah ồs đèng Dăk Lăk bơsram wơl, tơnguh uă nùs nhơm lơh broă geh bơta mờng chài kơnòl broă ờs mờng tàm broă lơh rơcăng sơndră crùh ồs sa mờ dong kờl rềs àr nàng kờñ tơrmù uă ngan rlau jơh hoàc hươr bè kòn bơnus mờ jơtài dilah geh jơnau ờ niam ồs sa bơrtoh gơlik geh.