VOV4.K’ho- Lơh jat Ngai Dunia tơrmù ƀà rềs àr tài bơh trồ tiah lơh aniai mờ Ngai ASEAN bè atbồ trồ tiah lơh aniai bơh ngai 13 tus ngai 19/10/2022, PC Dăk Lăk neh bơyai lơh uă broă lơh mblàng yal, pơgồp bơnah tơnguh uă bơta gĭt wă, kơnòl bơh ală mpồl cau mờ cau dùl nă să is dê tàm broă lơh rcang sơndră trồ tiah lơh aniai.

Cau lơh broă gah ồs đèng bơto sồr làng bol tàm broă ngui mờ sơndră mờ bơta ờ niam bơh ồs đèng

Kông ty ồs đèng thị xã Buôn Hồ

Mờ tơngume “Tơngkah lài gờñ mờ lơh broă gờñ”, ală mpồl lơh broă Ồs đèng Dăk Lăk sùm sền gĭt jơnau yal tơngĭt, rùp hin bè broă lơh rcang sơndră trồ tiah lơh aniai tàm ală gah yal tơngĭt jơnau, broă lơh lơngap lơngai lơh broă mpồl dê tàm pang web; yồng băng rôn tàm anih lơh broă mờ ală tiah gal làng bol ơm kis.... Kông ty kung sùm rcang lài mpồl cau, rơndeh rơndồ măy mok, phan bơna, rcang lài lam lơh jat tơn ală broă lơh rcang sơndră tŭ gơlik geh trồ tiah lơh aniai, bơta aniai.

Ngai Dunia tơrmù bà rềs àr tài bơh tài trồ tiah lơh aniai ngai 13/10 geh lơh tàm nam 1989, bơh Liên hợp quôk sơnđờm mŭt lơh nàng sơlơ tơnguh bơta niam chài gùt plai ù gĭt wă bè tơrmù ƀà rềs àr tài bơh trồ tiah lơh aniai. Mpồl ală lơgar tiah đah Jum mat tơngai lik câu Á kung ai ngai do nàng lơh Ngai ASEAN bè atbồ trồ tiah lơh aniai pah nam.

VOV Tây Nguyên/K’Hạnh mblàng