VOV4.K’ho- Tềng đap ală bơta gơlik geh nisơna bơh kàl mìu càl rơbŭt dờng dê, Kông ty Ồs đèng Dăk Lăk (PC Dăk Lăk) neh rcang lài ală broă lơh, rcang lài rcang sơndră mờ trồ tiah lơh aniai. Kông ty neh lơh 2 mpồl lam lài rcang sơndră trồ tiah lơh aniai mờ jòi dong kờl rềs àr mờ rlau 40 nă cau. Bal mờ kơnòl broă bơsong ală bơta aniai gơlik geh tàm càr Dăk Lăk, mpồl cau do rcang lòt gùng dong kờl ală càr gơ̆p bơyô in tŭ geh jơnau sồr jal mhar.

Kông ñân lơh kơ̆ kơljap wơl ală tiah jrong, dŭi che nàng tơrmù ƀà bơta pơhìn gơ pừ jrong tàm kàl mìu càl rơbŭt dờng

Ală mpồl lơh broă ồs đèng tàm càr sùm lòt sền lơh kơ̆ kơljap ală tiah ờ pràn bơh ală broă lơh gùng che ồs đèng dê, tam pà ngan ngồn tơl tổ, mpồl, cau dùl nă să is lòt sền mờ kong kơnòl gơ wèt mờ tơl gùng che ồs đèng, tơl trạm biến áp; gàr niam bơta lơngap lơngai ngan tàm ală jrong pơrgan dà dờng, pơrgan gùng lòt, jrong geh bơta jơnhoa dờng mờ ală tiah kwơ màng.... Mơkung pah dơ̆ lơh jat broă toah wàs rŭ rơm gùt dar gùng che ồs đèng, sơlơ pơgồp bal mờ ală tiah lơh lila ală broă lơh yal tơngĭt jơnau, mblàng yal nàng làng bol rcang lài gàr niam bơta lơngap lơngai gùng che ồs đèng.

VOV Tây Nguyên- Cau mblàng K’Hạnh