VOV4.K’ho- Ngai 07/6, Anih lơh broă kảñ sát lùp khàu, Ƀộ Kwang àng neh geh kơrnuat yă cau lơh tìs, kup jàm ing Ƀộ trưởng Ƀộ Y tế ồng Nguyễn Thanh Long, Củ tịc Ủy ƀan Ñân zân ƀòn dờng Hà Nội lài do ồng Chu Ngọc Anh mờ Thứ trưởng Ƀộ Khoa họk mờ Kông nghệ lài do ồng Phạm Công Tạc nàng lùp khàu ală broă lơh tìs gơ rềng tus broă Kông ty Việt Á tơnguh giă kít xét nghiệm kòp Kovid-19.

Lài hơ̆, drim ngai 07/6, Quôk hội neh pờ tê ring bal Nghị quyết bơh Quôk hội dê bè broă tơn jơh gơnoar broă kwang bàng Quôk hội khóa 15 gơ wèt tus mờ ồng Nguyễn Thanh Long, Mpồl kwang bàng Quôk hội càr Vĩnh Long mờ ring bal Nghị quyết bơh Quôk hội dê ring bal jơnau sồr bơh Thủ tướng Cíñ phủ dê bè broă tơn jơh at gơnoar broă gơ wèt tus mờ Ƀộ trưởng Ƀộ Y tế tơngai lơh broă bơh nam 2021 tus nam 2026. Hội đồng Ñân zân ƀòn dờng Hà Nội khóa 16 kung neh pờ tê ring bal tơn jơh at gơnoar broă Củ tịc Ủy ƀân Ñân zân ƀòn dờng Hà Nội khóa 16, tơngai lơh broă bơh nam 2021 tus nam 2026 gơ wèt tus mờ ồng Chu Ngọc Anh. Tềng đap broă do, uă kwang bàng Quôk hội đơs là, do là jơnau tơngkah bè nùs nhơm kwang bàng mờ dùl dơ̆ tai ai gŏ, broă lơh rơcang sơndră sa kuề sa kuà, broă ờ niam “ờ geh tiah kơryan, ờ geh bơta ờ kờp, bulah cau hơ̆ là cau lơi”.

Cau mblàng K’ Duẩn