VOV4.K’ho - Càr Lâm Đồng là càr geh bơta pràn bè broă lơh sa suơn sre. Tơnơ̆ mờ dơ̆ kòp Kovid-19, ală broă lơh sa tàm do neh mhar rê bè ờs wơl. Mơya, tài khà priă phan lơh broă sa suơn sre gơguh sùm, neh lơh priă geh bơh làng bol gơtìp gơmù uă ngan pơn drờm mờ lài. Bơdìh mờ ală broă lơh dờng bơh Cíñ phủ tàm broă lơh ngan nàng ring niam khà priă, càr Lâm Đồng gam lơh ngan chồl pràn lơh jăt rơndăp broă tơnguh bơutàu lơh sa suơn sre hữu kơ, tơmù broă ngui phơng hoá kọk nàng tơmù khà priă bơcri, tơnguh priă geh mờ cèng geh broă lơh sa suơn sre kơl jăp jăt broă lơh bơh drà kă bro dê.

             Làng bol lơh broă sa càr Lâm Đồng gam lơh ngan tơnguh bơtàu broă lơh sa suơn sre hữu kơ

Kàl tam biăp pa do bŭ lah geh tơnhào, khà priă ring niam, mơya ồng Phan Tùng Châu, kis tàm ƀòn Nghĩa Hiệp 2, xã Ka Đô, kơnhoàl Đơn Dương, càr Lâm Đồng kung gam ờ chờ tài priă geh gơtìp gơmù uă ngan pơn drờm mờ lài. Geh jơnau do là tài khà priă phan lơh broă sa suơn sre gơguh sùm, priă bơcri tàm broă lơh sa gơguh uă, tàm tŭ priă geh ờ gơguh lơh priă geh gơtìp gơmù uă. Ồng Châu pà git, tơnơ̆ mờ dơ̆ kòp Kovid-19 gơtờp uă, làng bol kis tàm do ờ hềt thàn chờ tài neh sơrlèt mờ tơngai kal ke ngan, den tŭ do pơn jăt tai gơtìp mờ bơta kal ke pa do. “Tŭ do khà priă phan lơh broă sa suơn sre gơguh uă ngan, priă bơcri tàm broă lơh sa gơguh. Tàm tŭ hơ̆, phan tăc geh, ndrờm ală bơta phan bè biăp tàm do ndrờm gơmù, priă geh ờ ring niam tài mìng là tăc mờ cau tus blơi lơm”.

Là càr geh sền là lam lài gùt lơgar bè lơh sa suơn sre jăt broă lơh kông nghệ kao, bơdìh mờ broă ròng kơnrồ dà toh, ka dà mrềt mờ ờ uă bơta rơpu, kơnrồ, sur iar, càr Lâm Đồng geh bơta pràn bè tam biăp, bơkào, atiso, kơphe, ce mờ ờ uă bơta phan tam krơi is ndai, mờ kờp jơh khà bă ù tam phan geh di pơgăp 280 rơbô lồ. Jăt ồng Đa Cát Vinh, Củ tịc mpồl cau lơh broă sa càr Lâm Đồng yal, tŭ do khà priă phan lơh broă sa suơn sre, tàm hơ̆ geh phan sa phan ròng mờ phơng sih neh gơguh 40% pơn drờm mờ lài do, mìng is geh ờ uă bơta phan gơguh mờr 2 dơ̆. Bơta do gam kơrian, lơh kal ke tus mờ làng bol, lơh gơrềng uă ngan tus mờ broă gơguh lơh sa bal bơh gah lơh sa suơn sre càr dê. Mờ gơnoar bơh să tờm, Mpồl cau lơh broă sa gam tơnguh broă lơh jăt ală broă dong kờl làng bol lơh broă sa bè broă ngui phan lơh broă sa suơn sre tơl khà, pleh mờ broă gơtìp hoàc huơr, geh tìp mờ ală khà priă càn, geh bơto tơnguh uă jơnau git wă tàm broă tam phan, jòi geh anih tăc ai làng bol lơh broă sa in... Ồng Đa Cát Vinh đơs: “Bŭ lah tơnơ̆ mờ kòp Kovid-19, ală broă lơh sa ndrờm geh wơl bè ờs. Mơya tài khà priă phan lơh broă sa suơn sre neh gơguh uă ngan, tàm hơ̆ uă ngan là phơng sih neh lơh làng bol ờ sŭk ngan, ờ iang nùs tàm broă bơcri priă lơh sa suơn sre tŭ do. Bol añ kung lam sồr mờ bal mờ làng bol jòi geh broă nàng tơmù kal ke, bè dong kờl ală khà priă, bơto bơtê khoa học kỹ thuật, dong kờl làng bol in git bè broă ngui phan geh lơh bơh broă lơh sa suơn sre bơh broă kă bro điện tử tŭ do”.

Khà priă phan lơh sa suơn sre gơguh uă neh lơh ờ niam uă ngan tus mờ gah lơh sa suơn sre càr Lâm Đồng dê. Tàm hơ̆, bơta gơtìp uă ngan là ală phan tờm càr dê bè biăp, kơnuh, plai chi ală bơta mờ kờp jơh bă ù tam tus 73 rơbô 500 lồ. Tềng đăp mờ bơta mùl màl do, ồng Nguyễn Văn Châu, Phó kwang atbồ Sở Nông nghiệp mờ Phát triển Nông thôn càr Lâm Đồng pà git, càr gam chồl pràn broă lơh jăt rơndăp broă tơnguh bơtàu lơh sa suơn sre hữu kơ, tơmù broă ngui phơng sih hoá họk nàng tơmù khà priă bơcri, mơya tơnguh uă bơta niam mờ bơta kwơ phan geh lơh bơh broă lơh sa suơn sre, tơnguh priă geh ai làng bol in. Kờp jơh bă ù lơh sa geh ai dờp hữu kơ tàm càr tŭ do neh geh 1 rơbô 300 lồ, gơguh uă rơlao 12 dơ̆ pơn drờm mờ 2 nam lài. Bơdìh hơ̆ tai, gam geh 750 lồ phan tam ală bơta gam tàm tơngai tam gơl bơh broă lơh sa bè ờs tus mờ broă lơh sa hữu kơ geh dan ai sră dờp tàm tơngai tus. Ồng Nguyễn Văn Châu đơs: “Khà geh gơguh neh lơh ờ niam tus mờ khà priă phan geh lơh, lơh gơmù priă geh bơh làng bol. Gah lơh sa suơn sre sền gŏ broă do den tàng neh bơto pơlam làng bol tơrgùm lơh sa gàr tơl niam broă lơh, tềm pềr phơng sih, sih di, sih tơl mờ sih geh cồng nha. Bal mờ hơ̆, càr chồl pràn broă lơh jăt rơndăp broă lơh sa suơn sre hữu kơ, tơmù ngui phơng hoá họk, ngui ală phan geh bơh broă lơh sa suơn sre nàng lơh phơng sih phan tam in”.

Rơndăp broă tơnguh bơtàu lơh sa suơn sre hữu kơ càr Lâm Đồng geh lơh tàm bơta broă lơh sa suơn sre kông nghệ kao, lơh sa suơn sre ngăc ngar mờ broă dờp ală phan geh lơh bơh broă lơh sa suơn sre càr dê tus bal mờ khà geh kwơ gùt plai ù. Tŭ làng bol neh tam gơl mờ ngui broă tam phan hữu kơ do, geh sền gròi jơh broă tam phan, tơmù geh priă tă mờ tơnguh uă priă geh, tơnguh priă geh tàm dùl bă ù tam phan... Geh bè hơ̆, làng bol lơh broă sa suơn sre càr Lâm Đồng đơs is mờ gah lơh sa suơn sre càr dê đơs bal hơ̆ sồng tơl bơta pràn sơndră mờ ală tam gơl bơh drà kă bro, tàm hơ̆ geh broă khà priă phan lơh broă sa suơn sre gơguh sùm bè tŭ do.

Cau cih Quang Sáng-Cau mblàng Ndong Brawl