Ală phan bơh Wa Hồ dê lời wơl geh bơta kwơ niam chài kòn bơnus uă ngan, là sơm pòl ồs sòl gùng, àng gơcrà bơta kwơ jơi bơtiàn mờ tŭ tơngai dê.

Tềng đăp mờ bơta dà lơgar gơtìp sơgràm phà, sền gŏ bơta rồn bơklơn iơh bơsăk bơh mpồl cau dờn jăt nùs nhơm bơh cau sò tơm iơh bơsăk, bơta glar bòl bơh làng bol lơh broă sa, klao pơnu kờñ gơboh mờ dà lơgar Nguyễn Tất Thành lơh ngan lik lòt hờ lơgar bơdìh hơ̆ sồng “geh rê dong kờl làng bol” tàm broă tơnklàs, geh bơta krơi is ai dà lơgar, bơta khăt gơboh, gơboh gơbài ai làng bol in. Nam 1941, tơnơ̆ mờ 30 nam lik lòt hờ lơgar bơdìh jòi gùng tơnklàs dà lơgar, Wa Hồ neh rê tàm dà lơgar kờñ gơboh, đơng lam mpồl kăc màng, lơh jăt rài kah yau Đảng he dê, lơh geh bơta krơi is ai Dà lơgar, khăt gơboh ai làng bol in. Tŭ bơta niam geh tus, Wa Hồ neh đơng lam kăc màng Nhai 8 geh cồng nha, lơh tam gơl rài kis làng bol lơgar Việt Nam, jơi bơtiàn Việt Nam. Wa Hồ gam là rùp rài kơ̆p kờñ geh bơta ring lơngai, bơh nùs nhơm gơ̆p bơyô mờ lơh broă bal đah ală jơi bơtiàn dê. Phó Giáo sư, Tiến sĩ Bùi Đình Phong, bơto tàm Hìu bơsram Họk viện Cíñ trị Dà lơgar Hồ Chí Minh yal mblàng: “Broă lơh bơh Hồ Chí Minh, bồ tơngoh kơlôi sơnơng Hồ Chí Minh, bơta niam Hồ Chí Minh, nùs nhơm Hồ Chí Minh pà gŏ: Hồ Chí Minh ngui bơta niam chài bè dùl dà bơsơ̆t, che bàr tơrbŏ bal ală jơi bơtiàn, tơn jơh ală bơta ờ ndrờm bal. Geh bal tŭ cau lơgar Tây, cau lơgar Mỹ sò tơm lơgar he, Wa Hồ kung gam đơs là: Sơgràm là pal lơh, mơya mhàm lơi kung là mhàm, kòn bơnus lơi kung là kòn bơnus. Wa Hồ sền kwơ rài kis cau lơgar Việt Nam kung sền kwơ rài kis cau lơgar Tây, lơgar Mỹ sơl”.

Ală jơnau đơs bơh Wa Hồ dê bè bơta niam, bơta krơi is, jơnau kờñ, bơta pràn... mờ ală bơta geh nùs nhơm pal jăt bè bơ̆t bơtàu củ nghĩa xã hội, lơh jăt gùng dà krơi is jơi bơtiàn mờ củ nghĩa xã hội là che brài pơrhê geh sùm, bơta pal jăt lơh jăt geh cồng nha kơnòl bơ̆t bơtàu mờ sền gàr Dà lơgar. Tiến sĩ Lê Trung Kiên, lơh broă tàm Viện Hồ Chí Minh mờ ală Kwang đơng lam Đảng he dê đơs tờm: “Phan lời wơl geh nùs nhơm kơl jăp bơh Củ tịc Hồ Chí Minh lời wơl gơwèt mờ jơi bơtiàn mờ rài dà lơgar, geh pơnrơ ngan mờ mùl màl geh tơngŏ loh ngan ai dà lơgar in hơ̆ là broă rơwah, jòi geh, lơh geh gùng dà broă lơh mờ bơ̆t bơtàu gùng dà krơi is jơi bơtiàn pơgồp bal mờ Củ nghĩa xã hội tàm lơgar Việt Nam. Kwơ màng tàm broă tam gơl pa dà lơgar dê den rê wơl mờ phan lời wơl bơh Hồ Chí Minh dê nàng gŏ geh ală nùs nhơm, jơnau đơs, jơnau kơlôi bơh Wa Hồ dê bè gùng dà pa neh pơgồp bal lơh gơs lý luận bè gùng dà tam gơl pa bơh Đảng Kộng sản lơgar Việt Nam tŭ do dê”.

Broă lơh kăc màng bơh Củ tịc Hồ Chí Minh anih sơn đờm mờ tơn jơh ndrờm wèt tus broă tơnklàs kòn bơnus, drơng gàr ai bơta gơboh gơbài kòn bơnus in. Phan lời wơl Hồ Chí Minh dê bè bơ̆t bơtàu mờ tơnguh bơtàu lơh sa, tơnguh sùm rài kis phan bơna bal mờ nùs nhơm ai làng bol in, lài jơh là làng bol lơh broă sa. Wa Hồ kung lời wơl ai rơnàng tơnơ̆ do in bơta kwơ phan lời wơl kwơ màng bè bơ̆t bơtàu Đảng bal mờ mpồl cíñ trị nàng ngui mờ tơnguh bơtàu bơceh pa di pal mờ bơta geh bơh jơi bơtiàn bal mờ rài dà lơgar dê. Jăt Giáo sư, Tiến sĩ Mạch Quang Thắng đơs, tàm bơta tŭ do pal lơh jăt nền nòn bơta git gơ̆p đềt mềr bal đah Đảng mờ làng bol: “Đảng bơh làng bol hơ̆ sồng geh. Hơ̆ là Đảng là kòn làng bol dê. Đảng geh kơnòl lơh gơs kơnòl broă bơh dùl nă cau kòn gơwèt mờ mè bèp dê là làng bol. Củ tịc Hồ Chí Minh đơs mùl màl rơlao là “Đảng là cau lơh dĭ, lơh broă làng bol in”. Bơta do tàm bơta kăc màng tŭ do sơlơ pal đơs uă ngan nàng lơh đềt mềr rơlao bơta git gơ̆p jăt di mờ bồ tơngoh bơh Hồ Chí Minh dê là bơta git gơ̆p đềt mềr bal đah Đảng mờ làng bol”.

Kơlôi sơnơng, ngui, tơnguh bơtàu bơceh lơh phan lời wơl Hồ Chí Minh nàng git tơl rơlao, nền nòn rơlao bơta kwơ dờng màng phan lời wơl bơh Wa Hồ dê gơwèt mờ jơi bơtiàn bal mờ kòn bơnus, mờ lơh bơta kwơ bơh phan lời wơl Hồ Chí Minh ngai sơlơ kơl jăk, àng gơcrà bal mờ jơi bơtiàn mờ kòn bơnus dê. Lơh jăt sùm, kơl jăp tàm bơta geh bơh phan lời wơl Hồ Chí Minh, jơi bơtiàn Việt Nam lơh geh cồng nha jơnau kơ̆p kờñ bơh Wa Hồ dê bè “bơ̆t bơtàu dùl lơgar Việt Nam ring lơngai, tơrgùm bal, krơi is, lơh tờm, pas gơs pràn kơl dang mờ pơgồp bal di pal tàm broă kăc màng dunia dê”.