Mho òr (21/08), tàm Hìu Quốk hội, Kwang geh jơng tàm Ƀộ Cíñ trị, Phó Củ tịc Duh broă sùm Quốk hội ồng Trần Thanh Mẫn – Kwang atbồ Mpồl bơyai lơh Pơrjum nghị sĩ gùt plai ù dơ̆ 9, neh đơng lam dơ̆ pơrjum mờ Mpồl bơyai lơh, ală Mpồl dềt gơwèt Mpồl bơyai lơh mờ Mpồl Dong broă Dà lơgar nàng sền wơl broă rơcang bơyai lơh pơrjum. Phó Củ tịc Duh broă sùm Quốk hội ồng Trần Thanh Mẫn đơs tờm, Pơrjum nghị sĩ kơnòm să gùt plai ù dơ̆ 9 bơh Mpồl tam klăc Nghị viện Dunia (IPU) geh Quốk hội Việt Nam dờp bơyai lơh là broă lơh bal mờ lơgar ndai geh kwơ màng bơh Đảng, Dà lơgar he dê tàm nam do.

Do là kơnòl cíñ trị dờng ngan, den tàng ală gah lơh broă, ală kấp, mpồl lơh broă pal lơh niam broă rơcang, drơng Pơrjum, lời wơl geh uă bơta niam bơnĕ gơwèt mờ ală kwang bàng tus bal Pơrjum bè rùp rài dà lơgar, kòn bơnus lơgar Việt Nam dê; broă wă năc – rò năc pal geh lơh nền nòn. Mìng gam rơlao 20 ngai tai geh bơyai lơh Pơrjum, tơngai rơcang ờ gam uă, đơs tờm bơta do, Phó Củ tịc Duh broă sùm Quốk hội ồng Trần Thanh Mẫn sồr tơnkah ală anih lơh broă, mpồl lơh broă bal mờ tơl mpồl bơnah broă gơrềng bal tơnguh nùs nhơm geh kơnòl uă, tus bal mờ jăt kơnòl geh jào.