VOV4.K’ho- Phó Củ tịc lơgar mò Võ Thị Ánh Xuân neh ơn bơkàu, chu ñàng kah kơlôi Củ tịc Hồ Chí Minh tàm tiah tềl kah yau dà lơgar kuơ màng Kim Liên, kơnhoàl Nam Đàn, càr Nghệ An. Tàm nùs nhơm ki ngàm kuơ màng, Phó Củ tịc lơgar mò Võ Thị Ánh Xuân bal mờ mpồl kwang bàng neh ơn bơkàu, chu ñàng, kah kơlôi, ai tơnggŏ nùs nhơm ki ngàm, kah ưn ngài uă ngan gơ wèt tus mờ Củ tịc Hồ Chí Minh- là kwang đơng lam bồ dờng màng ngan bơh Đảng mờ làng bol he dê, là cau ling khin cha jak chài tơngklàs jơi bơtiàn, là cau niam chài tiơng pơn rơ jak ngan, Củ tịc Hồ Chí Minh neh tă pơgồp, phi să jơh rài kis he dê ai broă lơh tơngklàs jơi bơtiàn, tơngklàs giai kâp, rài ring lơngai mờ gơboh gơbài bơh jơi bơtiàn Việt Nam mờ làng bol tàm dunia dê.

Cih tàm sră rơmit kah kir tàm tiah tềl kah yau Kim Liên, Phó Củ tịc lơgar mò Võ Thị Ánh Xuân cih “Ki ngàm mờ kah ưn ngài Bác Hồ, bol sau pơrgon jơh rài kis bơsram jat nùs nhơm, krơh niam, rài kis Hồ Chí Minh dê; lơh ngan pơgồp bal bơta pràn, dùl nùs bal bơt bơtàu Đảng he dê sàng goh, pràn kơldang, kơ̆ kơljap, pơgồp bơnah bơt bơtàu dà lơgar ngai sơlơ pas sơm, niam bơnĕ, gơguh jak; làng bol he gơboh gơbài, chờ hờp”.

Cau mblàng K’Duẩn