Tàm nùs nhơm chờ bơh Satềp Trung thu dê, Phó Củ tịc lơgar mò Võ Thị Ánh Xuân bal mờ Mpồl kwang bàng lơh broă mờ kwang đơng lam càr Dăk Lăk neh tus bal ală broă lơh: tus sền, nhơl ală dơ̆ nhơl ờs mờng, lơh gŭ đèng, lòt rò đèng, sền tamya đăng grài mờ sền ală dơ̆ đơs crih tam ya tàm mang chờ àng kơnhai ndar me.

Di tàm dơ̆ do, Phó Củ tịc lơgar mò Võ Thị Ánh Xuân neh pà 270 bơnah priă dong kờl bơsram, 120 nơm rơndeh coh ai kơnòm bơsram geh rài kis gơtìp kal ke in, jào pà 1 nơm hìu ai kòn dềt kòn đời mờ 1 rơbô 500 pò phan kờp jơh priă geh rơlao 1 tơmàn đong. Phó Củ tịc lơgar kơ̆p kờñ tàm tơngai tus, ală anih lơh broă, mpồl lơh broă mờ ală broă lơh lơh làng, mùl màl, hòi jà broă tus bal bơh ală mpồl lơh broă cíñ trị, mpồl bơtiàn lơh sa kă bro mờ gùt mpồl bơtiàn pơn jăt tai drơng gàr, di tŭ lam sồr, dong kờl kơnòm dềt, kơnòm bơsram geh rài kis kal ke mờ sền do là kơnòl tờm, jŏ jòng.