VOV4.K’ho- Ngai 18/8, Ủy viên Đảng dà lơgar, Phó Củ tịc lơgar mò Võ Thị Ánh Xuân bal mờ mpồl kwang bàng neh lòt còp mờ lơh broă tàm Pôs đồng ling sền gàr tiah nhàr dà lơgar Srêpôk, Ủy ƀan Ñân zân kơnhoàl Buôn Đôn mờ Trung đoàn Kảñ sát kơ động Tây Nguyên, ndrờm tàm càr Dăk Lăk lơm. Còp, sền swì, pơn jờng kwang bàng Pôs ling sền gàr tiah nhàr dà lơgar Srêpôk, Phó Củ tịc lơgar mò Võ Thị Ánh Xuân jờng rơ mờ đơs niam nùs nhơm tam klac bal, sơrlèt gan kal ke, lơh gơs kơnòl broă bơh kwang bàng, cau ling tiah nhàr dà lơgar càr Dăk Lăk dê, là càr geh ù tiah kuơmàng ngan tàm broă sền gàr lơngăp lơngai bơh tiah Tây Nguyên dê mờ bơh gùt lơgar dê.

Lơh broă mờ kwang đơng lam bồ kơnhoàl Buôn Đôn, Phó Củ tịc lơgar tơngkah, khà hìu bơnhă rƀah bơh kơnhoàl Buôn Đôn dê gam uă, geh rlau 37%. Do là bơta kơn jơ̆ dờng ngan gơ wèr mờ kơnhoàl tŭ lam lơh broă lơh gàr ờdo ờdă rài kis mpồl bơtiàn, bơtàu tơnguh kơ̆ kơljap... Phó Củ tịc lơgar sồr kơnhoàl Buôn Đôn đơs is mờ càr Dăk Lăk đơs bal pal sền gròi rlau tai tus broă lơh tơn jơh jơgloh tơrmù rƀah bơh ală bơta ƀuơn, bơta pràn kơnhoàl, càr dê.

Cau mblàng K’Duẩn