VOV4.K’ho- Mho ngai 01/04, Phó Củ tịc lơgar mò Võ Thị Ánh Xuân lòt còp mờ lơh broă mờ kwang bàng bal mờ cau ling tàm pôs đồng ling sền gàr tiah nhàr lơgar Gành Dầu, tàm ƀòn Gành Dầu, xã Gành Dầu, ƀòn dờng Phú Quôk, càr Kiên Giang. Pôs đồng ling sền gàr tiah nhàr lơgar Gành Dầu ătbồ gơl gah dà lềng jòng 33 kơi sồ. Tàm tiah dà lềng ătbồ geh 3 bồt là bồt Hòn Bàng, Hòn Thầy Bói mờ Hòn Móng Tay.

Tàm nam 2021, pôs đồng ling sền gàr tiah nhàr lơgar Gành Dầu neh sơrlèt gan kal ke nàng lơh gơs niam kơnòl broă dơ̆ lĕ bal, rơcăng sơndră kòp bơtờp mơkung rơcăng sơndră mờ ală cau lơh tìs mơkung hòi jà làng bol lơh ka tàm dà lềng lơh jăt di jơnau cih bơh kơrnoăt boh lam dê, sền gàr dà lềng bồt bơlào...Phó Củ tịc lơgar đơs niam ngan mờ jờng rơ ngan nùs nhơm tam klăc bal, sơrlèt gan kal ke lơh gơs kơnòl broă bơh ală kwang bàng mờ cau ling Pôs đồng ling sền gàr tiah nhàr lơgar Gành Dầu dê. Mơkung sồr pôs đồng pal sền gròi broă lơh bơ̆t bơtàu đảng nàng lơh niam broă lơh cíñ trị bồ tơngoh mờ ătbồ kwang bàng; bơ̆t bơtàu mpồl pràn kơldang kơ̆ kơl jăp tơl ală bơta, ngan là mpồl kwang bàng đơng lam bồ geh broă lơh jak mờ geh bơta kơ̆ dơn nùs nhơm cíñ trị mờ lơh krơh niam, lam lài tàm jơh ală broă.

Cau mblàng Lơ Mu K’Yến