VOV4.K’ho- Mho ngai 16/09, Phó Củ tịc lơgar mò Võ Thị Ánh Xuân đơng lam pơrjum Mpồl duh broă Kes priă sền gàr dong kờl kơnòm dềt Việt Nam nàng sền sơ wì cồng nha lơh broă bơh Hội đồng sền gàr dong kờl kơnòm dềt Việt Nam tàm 8 nhai pa do, lam lơh jat kơnòl broă ală nhai lồi nam do.

Phó Củ tịc lơgar mò Võ Thị Ánh Xuân đơng lam pơrjum Mpồl duh broă Kes priă sền gàr dong kờl kơnòm dềt Việt Nam

Phó Củ tịc lơgar mò Võ Thị Ánh Xuân đơs loh, tàm tơngai ală bơta kal ke bal, mơya mờ nùs nhơm mờ geh kơnòl bơh Mpồl duh broă dê neh ai tơlik jơnau kờñ hòi jà 100 tơmàn đong tàm nam do nàng dong kờl ai 100 rơbô nă kơnòm dềt mờ neh lơh geh rlau 50% broă rơndap lơh. Nàng sơlơ tơnguh bơta pràn mờ dong kờl uă rlau tai ai kơnòm dềt geh rài kis kal ke uă, Phó Củ tịc lơgar sồr Kes priă sền gàr dong kờl kơnòm dềt jat tàm bơta geh ngan nàng lơh broă rơndap lơh nam tus bè broă jàu dong kờl kơnòm dềt mờ hòi jà bơta pràn ai gơ in di pal. Tàm hơ̆ geh ală broă lơh dong kờl tơrgùm tàm broă: sơlơ tơnguh bơta pràn bơkah, reh lơh niam bơta ñŏ, kòp plai nùs bơh tàm kơl dul mè, lơh hìu ơm sa nggùl ngai tàm ală hìu bơsram tiah kal ke.

Cau mblàng K’Hạnh