Pơn jăt tai ală broă lơh tàm lơgar Kák Tiểu vương quốk Ả-rập thống nhất (UAE), tàm ală ngai bơh ngai 3 tus 4 nhai 5 nam 2023, Phó Củ tịc lơgar mò Võ Thị Ánh Xuân neh còp mờ lơh broă mờ Họk viện Ngoại giao Anwar Gargash, tập đoàn Masdar, Tập đoàn Mubadala, còp Đại sứ quán lơgar Việt Nam mờ tìp măt ala măt mpồl cau lơgar Việt Nam kis tàm lơgar UAE.

Tàm ală dơ̆ tìp, Phó Củ tịc lơgar mò Võ Thị Ánh Xuân yal bè ală gùng dà broă lơh dờng tàm broă lơh bal mờ lơgar ndai lơgar Việt Nam dê, tàm hơ̆ đơs tờm ai lài broă lơh bal mờ tơnguh bơtàu, lơh geh uă bơta bal tàm broă lơh bal mờ lơgar ndai, là bơyô, là lơgar lơh broă bal pin dờn mờ là lơgar tàm mpồl niam bal, geh kơnòl tàm mpồl bơtiàn dunia dê. Tàm dơ̆ tus còp ală tập đoàn Masdar mờ Mubadala, do là bàr tập đoàn dờng ngan lơgar UAE dê tàm gah năng lượng, năng lượng lơh geh wơl, Phó Củ tịc lơgar mò Võ Thị Ánh Xuân yal bè ală jơnau geh ai lài bơh Cíñ phủ lơgar Việt Nam dê tàm broă hòi jà bơcri priă lơgar bơdìh, tàm hơ̆ uă ngan là tàm gah tơnguh bơtàu tơlir mờ kơl jăp. Phó Củ tịc lơgar đơs nền, lơgar Việt Nam mờ lơgar UAE geh uă bơta niam lơh broă bal tàm gah do mờ kơ̆p kờñ ală kông ty sền gròi bơcri priă tàm ală rơndăp broă lơh năng lượng tàm lơgar Việt Nam.