VOV4.K’ho- Drim ngai 23/08, tàm Hà Nội, Phó Củ tịc lơgar mò Võ Thị Ánh Xuân, Củ tịc Mpồl duh broă Sền gàr dong kờl Kes priă Sền gàr dong kờl kơnòm dềt Việt Nam neh lòt còp mờ pà phan ai kơnòm dềt reh lơh niam wơl mbùng in tàm Hìu sơnơm Việt Nam - Cu Ba. Bơh nam 1997, Kes priă Sền gàr dong kờl kơnòm dềt Việt Nam neh lam lơh Broă lơh “Tài bơta ñŏ kơnòm dềt dê” nàng kờñ dong kờl priă jền reh ai kơnòm dềt Việt Nam gơtìp ală bơta ờ niam tềng kàng muh mat. Tơnơ̆ 25 nam dong kờl, kờp tus tŭ do, neh geh rlau 30 rbô nă kơnòm dềt tàm gùt lơgar geh reh.

Nam do, digơlan geh pơn jăt tai reh ai 2 rbô nă kơnòm dềt tàm ală càr tiah kơh bơnơm đah tô dà lơgar, tiah tàm gùl lơgar, Tây Nguyên mờ tiah ring đah jum dà lơgar in. Digơlan tàm dơ̆ do, Hìu sơnơm Việt Nam- Cu Ba mờ Mpồl Operation Smile geh dong kờl reh pơh mbùng, wàt bơr, as pơnời tềng kàng muh mat ai 800 nă kơnòm dềt ală càr tiah đah tô dà lơgar in. Jơh ală priă jền tă reh mờ ală priă tă ndai bè sa, ơm, lòt rê bơh kơnòm dềt dê geh dong kờl jơh lơm.

Cau mblàng Lơ Mu K’Yến