Bơh 19 nam lam lơh Khà jờng neh gơ hòi gơ jà gal ngan ală cau khoa họk kơnòm să Việt Nam tàm lơgar mờ bơdìh lơgar cih mat sền sơ wì jàu Khà jờng. Tus tŭ do, neh geh 194 nă cau dùl nă să jak ngan geh dờp khà jờng Quả kầu vàng. Mìng is, khà jờng ùr bơsram Khoa họk kông nghệ Việt Nam tus tŭ do neh geh 719 nă ùr bơsram jak ngan geh dờp khà jờng.

Đơs tàm dơ̆ tìp mat, Phó Củ tịc lơgar mò Võ Thị Ánh Xuân ngoh rơngac cih dờp ală tă pơgồp bơh 30 nă cau jak chài kơnòm să pơn iờ să ngan geh dờp khà jờng. Phó Củ tịc lơgar đơs là, ală cau kơnòm să dờp khà jờng lơh geh ală cồng nha bơh sơn rờp là kuơmàng ngan, pal ki ngàm ngan mơya kung pal git nền tềng hờ đap gam uă kal ke, kòl yan; sồr Đoàn dà lơgar pơn jat tai ngui niam, tơnguh bơngă pin dờn khà jờng dê nàng gơs là khà jờng sồ dùl bơh ơruh pơnu Việt Nam dê bè khoa họk kông nghệ.