Đơs tàm dơ̆ tìp mat, Phó Củ tịc lơgar mò Võ Thị Ánh Xuân đơs nền, sền wơl tŭ tơngai kah yau bơt bơtàu dà lơgar mờ sền gàr dà lơgar bơh jơi bơtiàn Việt Nam, sùm geh bơta phi să, tă pơgồp dờng màng bơh ală rơnàng cau ùr dê bal mờ gơp tam klac, at tê bal tă pơgồp bơta pràn bơt bơtàu mờ sền gàr broă lơh dờng màng dà lơgar. Tàm ală nam do, dà lơgar Việt Nam ngai sơlơ lơh sir mờ lam lơh geh cồng nha ală broă lơh nàng kờñ gàr niam gơnoar cau ùr, sơlơ lơh geh ring bal ùr klau mờ bơta gơguh jak bơh cau ùr dê.

Tŭ do, tàm Việt Nam, cau ùr geh rlau 50% khà kờp làng bol gùt lơgar mờ gam pơn jat tai at gơnoar broă kuơmàng tàm broă lơh bơt bơtàu mờ tam gơl pa dà lơgar. Kung tàm dơ̆ bơyai lơh, Phó Củ tịc lơgar ưn ngài mờ kơp kờñ, ală ùr đại sứ, Kwang atbồ anih ala mat cribơyai broă mờ lơgar ndai kâp 3, Kwang atbồ ală mpồl lơh broă dunia rơp pơn jat tai lòt bal, lơh broă bal, dong kờl Việt Nam lam lơh gơtùi broă lơh tam gơl pa mờ mut gơ rờm bal dunia, tàm hơ̆ geh ală jơnau kờñ bè ring bal ùr klau mờ jàu gơnoar ai cau ùr in.