VOV4.K’ho- Dờp jơnau jà bơh Phó Củ tịc lơgar mò Võ Thị Ánh Xuân dê, ồng Bounthong Chitmany, Uỷ viên Ƀộ Cíñ trị, Thường trực Ƀan Ƀí thư Đảng Làng bol Kăc màng lơgar Lào, Phó Củ tịc lơgar Lào còp ngan ngồn lơgar Việt Nam bơh ngai 17 tus ngai 19/7/2022.

Phó Củ tịc lơgar mò Võ Thị Ánh Xuân mờ ồng Bounthong Chitmany

Mho ngai 17/07, tơnơ̆ dơ̆ wă ngan ngồn, Phó Củ tịc lơgar mò Võ Thị Ánh Xuân neh tìp mat cribơyai mờ ồng Bounthong Chitmany tàm Hìu lơh broă Cíñ phủ. Cribơyai bè gùng dà pơlam lơh sơlơ tơnguh bơta gĭt gơ̆p lơh broă bal 2 gah tàm tơngai tus, 2 nă Phó Củ tịc lơgar ring bal pơn jat tai lơh sùm ală dơ̆ lòt còp, tìp mat kwang bàng kấp dờng tàm jơh ală gah; bơyai lơh niam ală broă lơh geh kwơ mờ geh ngan tàm Nam tam klăc bal lơh bơyô Việt Nam mờ Lào, Lào mờ Việt Nam nam 2022; pơgồp bal lam lơh jat niam mờ geh cồng nha ală jơnau ring bal kwang bàng kấp dờng. 2 gah đơs ngan pơn jat tai pơnđơl pràn lơh ngan bal mờ ală lơgar tàm mpồl sùm bơt bơtàu bơta tam klăc bal, ring bal bal mờ gơnoar broă tờm bơh ASEAN dê, gàr kơ̆ kơljap ală kơrnoat pal jat, bơta kwơ, nùs nhơm bal bè ală broă geh gơrềng tơn tus bơta ring lơngai, bơta lơngap lơngai tàm tiah do, ring bal nùs nhơm bơsong ală broă tàm tiah do mờ tàm dunia mờ ală broă lơh ring lơngai jat tàm bơnàng jă sền dờng màng adat boh lam dunia dê.

Cau mblàng K’Hạnh