Tam pà mờ Phó Củ tịc lơgar Việt Nam, Kwang atbồ lơgar Mozambique jờng rơ dơ̆ lòt còp bơh mpồl dê, ai tơnggŏ bơta pin dờn dơ̆ lòt còp bơh Phó Củ tịc lơgar mờ ală broă lơh cribơyai mpồl kwang bàng kâp dờng 2 lơgar dê rơp pơn jat tai lơh gơs bơta pràn pa, bơta gơn kơnờm pa, pơgồp bơnah sơlơ tơnguh rlau tai bơta git gơp lơh broă bal uă gah đah Việt Nam mờ Mozambique tàm tơngai tus. Tàm dơ̆ tìp mat, 2 nă kwang đơng lam bồ neh ai tơnggŏ bơta niam nùs bè ală cồng nha lơh broă bal lơh geh tàm mờr 50 nam do, ngan là tàm gah cíñ trị, cribơyai broă mờ lơgar ndai, lơh sa suơn sre, viễn thông, bơto bơtê mờ bơsram mờ broă tàm pơgồp bal tàm ală cribơyai uă lơgar bè Liên hợp quôk mờ Srơh ờ gơ wèt tàm dà lơgar lơi. Bàr nă kwang đơng lam bồ ring bal jàu ală Ƀộ, gah broă lơh geh gơ rềng bơh 2 lơgar dê cribơyai mờ geh ală rơndap broă lơh ngan ngồn jat gùng dà ai tơlik lài lơh broă bal neh geh ală kwang đơng lam bồ 2 lơgar git nền.