Ồng Đặng Thanh Hải, Kwang atbồ Tập đoàn lơh sa mờ măi mok Chah- phan kuơ tàm ù  Việt Nam (TKV) neh yal mờ Phó Củ tịc lơgar ală cồng nha geh pơn rơ tàm broă lơh sa kă bro, sền gròi, dong kờl rài kis ai rlau 94 rbô nă cau lơh broă bơh TKV dê in. Nam 2022, priă lơh geh bơh gùt Tập đoàn dê geh 166 rbô tơmàn đông, uă ngan rlau jơh bơh tŭ crơng gơs tus tŭ do, gơguh 28% pơndrờm dùl tŭ bal mờ nam 2021; tơmut tàm kes priă dà lơgar rlau 21 rbô tơmàn đông; priă nhai kờp bal tơl nă cau lơh broă là 16 tơlak đông pah nhai…

Phó Củ tịc lơgar mò Võ Thị Ánh Xuân nting bơr gờm chờ ală cồng nha mờ TKV mờ càr Quảng Ninh neh lơh geh tàm tơngai lài, kuơmàng bơta bơtàu tơnguh uă bơta, brồ guh pràn ngan bơh Quảng Ninh dê neh mờ gam pơgồp bơnah kuơmàng ngan tàm bơta bơtàu tơnguh bal bơh dà lơgar dê. Phó Củ tịc lơgar sồr ală mpồl pơn jat tai geh ală broă lơh tơnguh priă jền lơh geh, gròi sền ai rài kis, bơta lơngăp lơngai cau lơh broă in.