Tơngŏ bơta ngoh rơngăc geh tìp mat ală cau ala mat cau geh màng mờ dà lơgar pơn rơ ngan, Phó Củ tịc lơgar mò Võ Thị Ánh Xuân đơs loh, tàm sùm tơngai pa do, Đảng, Dà lơgar sền gĭt, broă lơh dong kờl cau geh màng mờ dà lơgar là kơnòl broă cíñ trị kwơ màng; sùm lời ai bơta sền gròi, lơh lài kwơ màng ai broă lơh dong kờl cau geh màng mờ dà lơgar in.

Phó Củ tịc lơgar sồr càr An Giang pơn jat tai lơh jăt niam bơta pràn tàm dơlam is mờ ai ƀà bơta pràn bơh đah bơdìh nàng lơh jăt niam ală kơnòl broă cíñ trị mờ Nghị quyết pơrjum dờng dơ̆ XI Đảng ƀộ càr dê neh ai, bơtàu tơnguh bơnĕ bơnài bal lơh sa, bơto bơtê, niam chài nàng rài kis làng bol in hờm ram, chờ hờp, geh dờp geh ală cồng nha bơtàu tơnguh bơh Dà lơgar mờ ală tiah dê.