VOV4.K’ho - Drim òr (21/07), Phó Củ tịc lơgar mò Võ Thị Ánh Xuân neh tus bal dơ̆ pơrjum cau ùr lơh ling kăc màng gơtìp ling sò tơm kŭp jàm tàm rài tam lơh mờ ling lơgar Mỹ sò tơm di tơnkah 75 nam ngai cau ling sồt să, cau ling chơ̆t màng tàm ƀòn dờng Hồ Chí Minh.

Tàm 200 nă kwang bàng ala măt rơlao 600 nă cau ùr lơh ling kăc màng ƀòn dờng Hồ Chí Minh dê, bŭ lah geh ală cau sơnam neh dờng, mơya kung gam pơn jăt tai là ală cau lam lài, ai geh bơta pràn bơ̆t bơtàu ƀòn dờng, dà lơgar in. Do kung là dơ̆ tìp măt sơnrờp ngan bơh ală cau ùr lơh ling kăc màng gơtìp kŭp jàm tàm rài tam lơh mờ ling lơgar Mỹ sò tơm. Đơs tàm dơ̆ pơrjum, Phó Củ tịc lơgar mò Võ Thị Ánh Xuân ala măt Đảng, Dà lơgar tơlik nùs nhơm ki ngàm mờ ưn ngài tềng đăp mờ bơta phi să dờng màng bơh ală mè, ală mlŏ, ală bi gơtìp ling sò tơm kŭp jàm tàm rài tam lơh mờ đơs tờm, tơl nă kwang bàng, cau geh đảng tŭ do pal lơh ngan bơsram tàp nùs nhơm niam, bơta pràn, kơ̆ nùs bè ală cau ling kăc màng lài do dê, ai dà lơgar gơguh, tơnguh bơtàu mhar mờ kơl jăp, ưn ngài rơnàng lài do neh phi să tài bơta khăt gơboh is dà lơgar dê.

Cau mblàng Ndong Brawl