Tàm dơ̆ lơh broă mờ Củ tịc Mpồl duh broă ƀòn dờng Maputo, Kwang geh jơng tàm Ƀộ Cíñ trị Đảng Frelimo at gơnoar broă Eneas Comiche, Phó Củ tịc lơgar mò Võ Thị Ánh Xuân đơs tờm, càr lơgar Maputo lơgar Mozambique geh uă bơta pơgồp bal đềt mềr mờ lơgar Việt Nam, là tiah geh gùng dờng Hồ Chí Minh, rùp rài niam bơneư ngan ai nùs nhơm tam klăc bal mờ lơh bơyô bal đềt mềr đah bàr jơi bơtiàn kòn cau dê.

Bàr gah ring bal tơnguh broă tam gơl mpồl, ai broă lơh broă bal đah bàr lơgar mŭt tàm bơta jrô ơnàng, mùl màl, geh cồng nha; tam pà bal broă mờng chài bơ̆t bơtàu càr lơgar jăt gùng dà tam gơl pal bơceh pa, tam pà bal broă atbồ tiah drà mờ tiah kis tiah drà. Tơnơ̆ mờ dơ̆ tìp măt, Phó Củ tịc lơgar mò Võ Thị Ánh Xuân bal mờ Củ tịc Mpồl duh broă ƀòn dờng Maputo neh tus bal mŭt ngui măt sơnđan pa mờ pơdơng bơkào tềng gùng dờng Hồ Chí Minh.