Tus bal dơ̆ pơrjum geh Phó Củ tịc lơgar mò Võ Thị Ánh Xuân, kwang đơng lam ală ƀộ, gah lơh broă dà lơgar bal mờ ala măt Mpồl tam klăc lơh bơyô mờ Mpồl lơh bơyô đah lơgar Việt Nam mờ lơgar Singapore. Tàm pơrjum tơnkah, ală kwang bàng neh yal wơl tơngai git gơ̆p lơh broă bal jơh nggùl rài do đah lơgar Việt Nam mờ lơgar Singapore dê.

Tơnơ̆ mờ 50 nam, tus tŭ do, lơh broă bal đah bàr lơgar ngai sơlơ nền nòn mờ geh sùm tàm uă gah broă. Lơh broă kă bro mờ bơcri priă neh geh ală cồng nha uă ngan. Đơs tàm pơrjum tơnkah, Phó Củ tịc lơgar mò Võ Thị Ánh Xuân đơs tờm: Gơtùi đơs bơta git gơ̆p đah lơgar Việt Nam mờ Singapore là dùl broă lơh geh cồng nha, tàm jơh lơh broă bal đah bàr lơgar, uă lơgar. Bơta đềt mềr, pin dờn ai geh bơta niam nàng lơh pràn bơta git gơ̆p lơh broă bal jrô ơnàng, mùl màl tàm uă gah broă.