Đơs tàm dơ̆ tìp măt, Phó Củ tịc lơgar mò Võ Thị Ánh Xuân đơs tờm, lơgar Việt Nam sùm sền kwơ broă lơh ngan mờ tơnguh bơta ring bal, lơh broă bal, geh kwơ bal mờ ală lơgar, ală mpồl lơh broă dunia, tàm hơ̆ geh ală lơgar, ală mpồl lơh broă dunia mờ ală Đại sứ, ală kwang atbồ ala măt ală mpồl lơh broă dunia là cau ala măt.

Di tàm dơ̆ do, ala măt Dà lơgar bal mờ làng bol lơgar Việt Nam, Phó Củ tịc lơgar pơyoa jơnau ưn ngài uă ngan tus cíñ phủ bal mờ làng bol ală lơgar, ală mpồl lơh broă dunia neh kờñ bal, lơh broă bal mờ dong kờl lơgar Việt Nam tàm jơh gùt tơngai pa do. Mờ kơ̆p kờñ geh pơn jăt lơh pràn broă git gơ̆p, lơh broă bal mờ ală lơgar, ală mpồl lơh broă dunia nền nòn, mùl màl, geh cồng nha tàm jơh ală gah broă. Ala măt ală ùr Đại sứ, kwang atbồ ala măt ală mpồl lơh broă dunia tàm lơgar Việt Nam, mò Samina Naz, Đại sứ lơgar Bangladesh tàm lơgar Việt Nam pà git, ai gơnoar cau ùr mờ kơnòm ùr dềt in là kơnòl bal. Ngai dunia cau ùr là dơ̆ niam nàng ală lơgar sền wơl ală jơnau hơ bal do, kung bè ală cồng nha neh lơh geh, bơta lòng gam tềng đăp măt.