VOV4.K’ho- Tàm Gơlang Củ tịc, Phó Củ tịc lơgar mò Võ Thị Ánh Xuân neh wă mpồl cau ala mat ùr kwang bàng gah Ngân hàng di tơngkah Ngai dunia cau ùr 08/3. Tàm dơ̆ wă, Thống đôk ngân hàng dà lơgar Việt Nam mò Nguyễn Thị Hồng pà git, khà cau ùr geh mờr 60% mpồl cau lơh broă tàm ală ngân hàng mờ geh 24% kờp jơh ală gơnoar broă atbồ dờng màng. Gah ngân hàng gam lam lơh broă rơndap lơh priă jền tơl làm dà lơgar tus nam 2025, gùng dà broă lơh ai tơlik tus nam 2030, tàm hơ̆ cau ùr là mpồl cau geh sền gròi ngan.

Phó Củ tịc lơgar mò Võ Thị Ánh Xuân pơyua jơnau nting bơr niam ngan rlau jơh tus ùr kwang bàng gah Ngân hàng đơs is mờ cau ùr tàm gùt lơgar đơs bal, đơs nền, gah Ngân hàng đơs bal, ùr kwang bàng gah do đơs is sền gròi, lòt bal mờ Mặt trận dà lơgar Việt Nam, ală mpồl cíñ trị mpồl bơtiàn nàng kờñ lam lơh di tŭ ală broă lơh gàr ờdo ờdă rài kis mpồl bơtiàn, lơh broă niam dong kờl cau, kis git jơnau git adat. Kwang đơng lam bồ Ngân hàng dà lơgar Việt Nam pơn jat tai sền gròi tơl làm bè broă lơh ùr kwang bàng bơh gah do dê, bơto bơtê, bơto pơlam kwang bàng brồ guh ndờm bal mờ khà ùr kwang bàng tàm jơh gùt gah do.

Cau mblàng K’Duẩn