VOV4.K’ho- Wèt tus tơngkah 75 nam Ngai cau ling sồt să- Cau ling chơt màng (27/7/1947- 27/7/2022), drim ngai 10/6, tàm Hìu duh broă Củ tịc, Phó Củ tịc lơgar mò Võ Thị Ánh Xuân wă Mpồl cau ala mat geh màng mờ dà lơgar càr Dăk Nông di dơ̆ mpồl lòt còp càr lơgar Hà Nội mờ mut còp gơlăng ƀồc Bác Hồ. Tŭ do, càr Dăk Nông geh rlau 13 rbô nă cau geh sră dong kờl bơh dà lơgar, tàm hơ̆ cau geh dờp priă dong kờl pah nhai là mờr 3 rbô nă. Bal mờ broă lơh dong kờl bơh Đảng mờ dà lơgar dê, srơh jơh gùt làng bol sền gròi cau ling sồt să, cau ling kòp tê jê să, hìu bơnhă cau ling chơt màng mờ cau geh màng mờ dà lơgar bơh càr dê neh lơh geh uă cồng nha, gơtùi tơnguh bơta pràn jơh gùt làng bol tus bal. Sền bal, rài kis bơh cau geh sră dong kờl bơh dà lơgar tàm càr geh gàr niam.

Phó Củ tịc lơgar mò Võ Thị Ánh Xuân pà phan kir sơnrai ai cau geh màng mờ dà lơgar càr Dăk Nông in

Boh bơr mờ mpồl cau ala mat cau geh màng mờ dà lơgar càr Dăk Nông, Phó Củ tịc lơgar mò Võ Thị Ánh Xuân ai tơnggŏ bơta kah ưn ngài gơ wèt tus mờ cau geh màng mờ dà lơgar bơh càr Dăk Nông dê, kơp kờñ càr ngui sùm bơhiàn tam klac bal, kờñ gơboh dà lơgar bơh làng bol ală jơi bơtiàn kòn cau Tây Nguyên dê at tê bal bơt bơtàu ƀòn tờm lam lơh niam 2 kơnòl broă bơt bơtàu mờ sền gàr dà lơgar, mờ kung pơn jat tai sền gròi lam lơh niam broă lơh dong kờl cau geh màng mờ dà lơgar, nàng bơto bơtê nùs nhơm kờñ gơboh dà lơgar, bơhiàn bơh jŏ bơh jơi bơtiàn dê gơ wèt tus mờ mpồl bơtiàn.

Cau mblàng K’Duẩn