VOV4.K’ho- Ngai 07/06, tàm Hìu duh broă Củ tịc, Phó Củ tịc lơgar mò Võ Thị Ánh Xuân wă mpồl cau ala măt cau geh màng mờ dà lơgar càr Đồng Nai di dơ̆ mpồl lòt còp càr lơgar Hà Nội mờ mŭt tàm Gơlăng ƀồc còp ies ƀồc Wa Hồ. Càr Đồng Nai tŭ do geh rlau 52 rbô nă cau geh màng mờ dà lơgar mờ cau pròc mhàm cau geh màng mờ dà lơgar. Tàm hơ̆ geh 1 rbô 141 nă Mè Việt Nam khin cha jak chài.

Tơm bơh bơr mờ mpồl cau ala măt cau geh màng mờ dà lơgar càr Đồng Nai dê, Phó Củ tịc lơgar mò Võ Thị Ánh Xuân jờng rơ ală broă lơh ngan bơh càr Đồng Nai dê tàm broă lơh jăt broă dong kờl ai cau geh màng mờ dà lơgar in; sồr càr Đồng Nai pơn jăt tai hòi jà jơh gùt mpồl bơtiàn tus bal dong kờl cau geh màng mờ dà lơgar bơtàu tơnguh uă rài kis jơh bal bè phan bơna mờ nùs nhơm; ngan là tàm ală gah broă lơh, bè bơ̆t bơtàu, lơh niam wơl hìu ơm.

Phó Củ tịc lơgar kung kơ̆p kờñ cau geh màng mờ dà lơgar càr Đồng Nai pơn jăt tai đòm jăt bơhiàn kờñ gơboh dà lơgar, tus bal mblàng yal ai làng bol tàm ƀòn lơgar in lơh jăt niam ală jơnau sồr bơh Đảng dê, kơrnoăt boh lam bơh Dà lơgar dê, bơ̆t bơtàu ƀòn lơgar tờm ngai sơlơ jak chài, pas sơm niam bơnĕ.

            Cau mblàng Lơ Mu K’Yến