VOV4.K’ho- Di tơngkah kir sơnrai 75 nam Ngai Cau ling sồt să- Cau ling chơ̆t màng, drim ngai 25/07, tàm Hìu duh broă Củ tịc, Phó Củ tịc lơgar mò Võ Thị Ánh Xuân wă Mpồl cau ala măt Mpồl cau ùr cau ling Trường Sơn- Gùng Hồ Chí Minh. Đơs tàm dơ̆ wă, Phó Củ tịc lơgar mò Võ Thị Ánh Xuân tơlik nùs nhơm chờ hờp tŭ geh tìp măt ală Cau ùr cau ling Trường Sơn Khin cha jak chài; Phó Củ tịc lơgar cih dờp mờ jờng rơ ngan bơta tă pơgồp mờ ală cồng nha lơh geh jak chài ngan bơh cau ùr cau ling Trường Sơn dê tàm dơ̆ tam lơh mờ bol sò tơm Mỹ, dong klàs dà lơgar.

Đơs nền, bơta phi să bơh ală cau ùr cau ling Trường Sơn dê neh pơgồp bơnah dờng ngan bal mờ jơi bơtiàn lơh gơs bơta tam lơh jai pha pơnrơ ngan. Rùp să bơh ală cau ùr cau ling Trường Sơn dê là krơh àng ai rơnàng kơnòm să in ngai do bơsram mờ đòm jăt. Phó Củ tịc lơgar kơ̆p kờñ ală cau ùr cau ling Trường Sơn pơn jăt tai lơh kơnòl broă cau sền gŏ jơnau kah yau bơto bơtê oh kòn kòn sau, rơnàng kơnòm să, oh mi cau ùr tàm tiah lơh broă, mpồl tam klăc, tàm pơrlòng lơh broă lơh sa, bơsram, bơ̆t bơtàu rài kis pa.

Cau mblàng Lơ Mu K’Yến