Đơs tàm dơ̆ lơh broă tàm càr Bến Tre, Phó Củ tịc lơgar Võ Thị Ánh Xuân chờ hờp ngan tŭ tàm nam lài, lơgar he neh sơrlèt gan uă kal ke, bơta lòng nàng lơh geh bàr pe cồng nha kwơmàng ngan tàm jơh ală gah broă. Phó Củ tịc lơgar sồr Đảng ƀộ, gơnoar ătbồ mờ làng bol càr Bến Tre pơn jăt tai lơh ngan jơh nùs jơh tồr nàng lơh geh ală broă jàu mờ Kơrnoăt Pơrjum dờng ală kâp neh sồr; sền gròi bơcri priă lơh ală hìu niam chài, mpồl bơtiàn, lơh sơnơm, bơto bơtê, ală bơta kwơ bal mpồl bơtiàn geh kwơ ngan rlau jơh ai làng bol in, ngan là ală tiah sar lơgar ngài, tiah pôs đồng kăc màng. Bơh hơ̆ nàng làng bol in tơnguh uă bơta niam tàm rài kis.

Di tàm dơ̆ do, Phó Củ tịc lơgar Võ Thị Ánh Xuân jàu sră lơh pơnyơu gời pà càr Bến Tre lơh 10 nơm hìu tam klăc dờng, kờp priă 500 tơlak đong; Kes priă Sền gàr dong kờl kơnòm dềt Việt Nam pà 200 tơlak đong dong ală oh geh rài kis kal ke. Mơkung jàu pà 200 bơnah phan ai ală hìu rƀah, hìu mờr ndrờm bè hìu rƀah, ală hìu bơnhă cíñ săc geh rài kis kal ke; 200 bơnah phan ai cau lơh phan cau lơh broă in; 200 bơnah phan ai kơnòm dềt geh rài kis kal ke ngan mờ kal ke tàm ù tiah càr Bến Tre dê in, kờp jơh priă là 700 tơlak đong.