Cribơyai do bơh Anih tờm Dunia Jak chài mờ Bơto bơtê Ală gah pơgồp bal mờ Mpồl tam klăc bal Nghị viện dunia dê bơyai lơh bal mờ tơngume “Lơngăp lơngai mờ ờ gàr tơl dà căt: lơh geh wơl bơta ơm kis bal ring lơngai mờ jak chài”.

Đơs tàm dơ̆ cribơyai do, ồng Nguyễn Đức Hải, Phó Củ tịc Quôk hội đơs wih đơs wơl, Việt Nam neh geh uă broă lơh nàng gàr niam tơl dà căt, sền gròi tus broă lơh sir gơs ală adat boh lam, tàm hơ̆ geh rlau 100 sră nggal ătbồ gơrềng tus dà. Tàm pơrjum dơ̆ 6 tàm nhai 10 tus, Quôk hội rơ̆p sền swì, ring bal Adăt Phan kwơ geh is dà (tam gơl) nàng tam gơl wơl jơh ală bơta bè dà căt; mơkung gam sồr ală anih lơh broă kờp sền wơl ală Adăt geh gơrềng nàng kờñ lơh sir gơs ală tơngume adat boh lam bè gàr tơl niam dà căt. Quôk hội lơgar Việt Nam neh rơcăng lài, jơh nùs sồr lơh ală broă lơh mờ tus bal ală jơnau bơceh lơh gùt plai ù bơh Mpồl Tam klăc bal Nghị viện Dunia dê.