VOV4.K’ho- Di tơngkah 75 nam Ngai cau ling sồt să- cau ling chơt màng, ngai 25/7, Mpồl kwang bàng bơh Quôk hội dê bơh Thượng tướng Trần Quang Phương, Phó Củ tịc Quôk hội lơh kwang atbồ mpồl neh lòt còp, pà phan 2, 3 hìu bơnhă geh sră dong kờl bơh dà lơgar, cau geh màng mờ dà lơgar tàm càr Lâm Đồng.

Thượng tướng Trần Quang Phương mờ mpồl kwang bàng lùp còp Thiếu tướng Phạm Văn Kha (rùp cau lơh broă bal Nhật Quỳnh)

Tàm ală anih tus còp, Phó Củ tịc Quôk hội ồng Trần Quang Phương neh jơh nùs lùp còp pràn kơldang să jan, rài kis bơh ală kwang bàng lài do là kwang đơng lam bồ, cau pròc mhàm tờm bơh cau geh màng dà lơgar mờ hìu bơnhă dê. Mờ kung ai tơnggŏ nùs nhơm git ưn ngài tus ală tă pơgồp bơh ală rơnàng lòt lài dê tàm broă lơh bơt bơtàu mờ sền gàr dà lơgar.

Mpồl kwang bàng Quôk hội dê mờ kwang đơng lam bồ càr Lâm Đồng ơn bơkàu kah kơlôi ală cau ling chơt màng tàm ƀlàng tơp ƀồc cau ling chơt màng Dà Làc (rùp cau lơh broă bal Nhật Quỳnh)

Phó Củ tịc Quôk hội kung pơyua jơnau nting bơr tus ală kwang bàng lài do, cau pròc mhàm tờm cau ling chơt màng dê pơn jat tai kis chờ hờp, kis pràn kơldang, sền gàr mờ bơtàu tơnguh bơhiàn kac màng bơh hìu bơnhă dê, sùm là ală krơh niam ală rơnàng kòn sau in đòm jat. Lài hơ̆, Thượng tướng Trần Quang Phương mờ mpồl kwang bàng neh tus ơn bơkàu, chu ñàng kah kơlôi ală cau ling khin cha jak chài chơt màng tàm ƀlàng tơp ƀồc cau ling chơt màng Dà Làc.

Cau mblàng K’Duẩn